Улсын хэмжээнд нэг сая 300 мянган хүүхэд, хөгшид, хөгжлийн бэрхшээлтэй хүмүүст хувь хишиг түгээж байгаа. Одоогийн байдлаар тэдний 70 орчим хувь нь 70 мянган төгрөгөө аваад байна гэсэн статистик гарсан. Төр засгаас гаргасан аливаа нэг шийдвэр араасаа элдэв хэл үг дагуулж байдаг жишгээр 70 мянган төгрөгийн хувь хишгийн улмаас хорооноос  иргэдэд “Итгэмжлэх бичиг” гаргаж өгөхөө болиод байгаа ажээ. Энэхүү  “Итгэмжлэх бичиг”-ээр хэвтэрт байгаа хүмүүсийн тэтгэвэр тэтгэмжийг авахаас гадна гадаадад суугаа, түр хугацаагаар эзгүй байгаа нэгнээ гэр бүлийнхэн нь төлөөлөх эрхийг авдаг. Гэтэл сүүлийн хэдэн өдрүүдэд хороод дээр хувь хишгээ хүртэж чадаагүй хөгшид уйлж орж ирэх нь нэмэгдсэн гэнэ. Тэдгээр хөгшид “Хувь хишгийг маань хүүхдүүд аваад архи уучихсан байна. Ааруул ээзгийгээ ч авч чадсангүй” хэмээн гомдоллох болжээ. Тиймээс Баянзүрх дүүргийн долдугаар хороо иргэдэд “Итгэмжлэх бичиг” олгохгүй байхаар шийдсэн гэж тус хорооны нийгмийн ажилтан хатуурхан мэдэгдэв. Хэвтрийн хөгшид болон хагжлийн бэрхшээлтэй иргэд хувь хишгээ хэрхэн авах вэ гэсэн асуултад тэрбээр “Хэвтрийн хүнтэй айл наториатаар баталгаажуулсан итгэмжлэхээр мөнгийг нь авч болно. Наториатын хүнээ өөрсдөө гэртээ аваачаад баталгаа хийлгэх хэрэгтэй. Биднийг “Итгэмжлэх бичиг” өгөхгүй байх үүргийг дээрээс өгсөн” гэлээ. Тус хорооны зүгээс хүүхдүүдийн хувь хишгийг аав нарт өгөхгүй, зөвхөн эхчүүдэд олгоно гэсэн байр суурь барьж байгаа ажээ.

Д.Цээнэ