З.Энхболд: АН фракц бүлэглэлээс чөлөөлөгдлөө

2017 оны 2 сарын 12

Ардчилсан намын дарга асан З.Энхболд албан тушаалаасаа чөлөөлөгдөхийн өмнө намын гишүүддээ хандаж үг хэлсэн. Түүний үг гишүүдийнх нь анхаарлыг татаад байна.

Тэрбээр “Ардчилсан нам фракц бүлэглэлийн барьцаанаас өөрийгөө чөлөөлж чадлаа. Бодлого боловсруулах, асуудал шийдвэрлэх, хүний нөөцийн томилгоо хийхээс эхлээд намынхаа хурлыг хийхэд хүртэл фракцтай зөвшилцөж, тэдний эрх ашиг нийцүүлэхээс өөр аргагүй байдалд ордог. Тэдний эрх ашигт нийцэхгүй бол асуудлыг шийдвэрлэх ирц хүрэхгүйд хүрдэг байдлаас Ардчилсан нам салж чадлаа.

Энэ удаагийн их хурлын зардлыг фракц бүлэглэл, олигархууд, оффшорчдоос авахгүйгээр, нийт жирийн гишүүдийн хандиваар бүрдүүлсэн гэдгээ хэлэхэд таатай байна.

Ардчилсан нам үүд хаалгаа нээж чадлаа. Намын анхан ба дунд шатны байгууллагыг өөрийн хүрээллийн хэдхэн хүнээр бэхжүүлж, үүд хаалгаа хаадаг тогтолцоо өнөөдрөөс эхлэн нурж байна. Ардчилсан нам шинэчлэлийг ингэж эхлүүлж, ардчилал шинэчлэлийн үлгэр дуурайлал болж ирсэн урьдын ололт, гайхамшигтай туршлагаа дахин давтлаа. Энэ шинэчлэлийг хийж чадсан нийт гишүүддээ баярлалаа” хэмээсэн юм.

Тус хуралд Ардчилсан намын лидерүүдээс Э.Бат-Үүл, Д.Дорлигжав нарын олон гишүүн оролцож буй. Харин Ч.Сайханбилэг, Н.Алтанхуяг, С.Баярцогт нар ирээгүй байгаа юм.

Гэрэл зургийг Н.БАТМӨНХ

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна