Бидний тухай гадаадын хэвлэлд: Амьсгалах агааргүй

ОХУ-ын КоммерсантЪ сонин Улаанбаатарын агаарын бохирдлыг харуулсан цуврал зургийг нийтэлжээ.

Дэлхийн хамгийн их агаарын бохирдолтой хотын нэг бол Улаанбаатар. Агаар дахь хортой бодисын хэмжээ Дэлхийн Эрүүл мэндийн байгууллагаас гаргасан стандартаас хэдэн арав дахин илүү байгаа юм. Улаанбаатар хотын иргэд хэрхэн амьдарч байгаа болон эрх баригчид утаатай хэрхэн тэмцэж байгааг Фотогалерей буландаа харууллаа.

Улаанбаатар хамгийн бохирдсон агаартай хотын нэг, эндхийн агаарын бохирдол Бээжингээс ч илүү.

Агаарт хаягдах хорт бодисын хэмжээ өвлийн улиралд эрс нэмэгддэг. Гэрт амьдардаг өрхүүд нүүрс түлдэг.

Нийслэл Улаанбаатарын хүн амын 67 хувь нь гэр хороололд амьдардаг. Тэд гэрээ дулаацуулах, хоол ундаа бэлтгэхийн тулд жилдээ хоёр сая тонн түүхий нүүрс түлдэг.

Улаанбаатарт ажиллаж байгаа дөрвөн цахилгаан станц жилдээ зургаан сая тонн нүүрс хэрэглэдэг.

Нийслэлийн нэгэн иргэн нүүрс түлсэн зуухны илчинд гараа дулаацуулж байна.

Нийслэлийн цахилгаан станц болон иргэдийн түлдэг нүүрсийг Улаанбаатарын ойролцоох нүүрсний уурхайгаас татдаг. Тэд 60 метрийн гүнд ажилладаг.

Хоёрдугаар сарын эхээр авсан үзүүлэлтээр Улаанбаатарын агаар дахь РМ2.5 хортой бодисын түвшин 855 мкг хүрчээ. Энэ үзүүлэлт Бээжинд 70 мкг. Харин дэлхийн Эрүүл мэндийн байгууллагын зөвшөөрөгдсөн хэмжээ 20-25 мкг.

Энэ оны нэгдүгээр сарын сүүлээс агаарын бохирдлын эсрэг арга хэмжээ авахгүй байгааг эсэргүүцэн иргэд жагсч эхэлсэн.

Жагсагчдын хэлснээр Засгийн газар өгсөн Өргөх бичгийн дор 7000 хүн гарын үсгээ зуржээ.

Төрийн ордны өмнө болсон жагсаалд оролцогч энэ эмэгтэй утаа “үйлдвэрлэж” байгаа янданг дууриалган хийсэн малгай өмсчээ.

“Агаарын бохирдлын улмаас хүүхдүүд долоо хоног болгон ханиад хүрч, цэцэрлэгтээ явж чадахгүй байна” хэмээн нэгэн иргэн “Ройтер” агентлагийн сурвалжлагчид ярилаа. Агаар дахь хортой бодисын түвшин нэмэгдсэнтэй холбоотойгоор ямар нэг арга хэмжээ авах хууль эрх зүйн механизм байхгүй юм.

Цаг бусын үхлийн шалтгааны 9.2 хувь нь агаарын бохирдолтой холбоотой гэж эмч нар хэлдэг. Хүүхдийн амьсгалын замын24,1, хавдрын 39,9 хувь нь агаарын бохирдолтой холбоотой.

Монголын хэвлэл мэдээлэлд бичиж байгаагаар дөрвөн жилийн хугацаанд агаарын бохирдолтой тэмцэхэд 135 тэрбум төгрөг зарцуулсан 56 сая ам.доллар гэсэн үг юм.

2017 оны нэгдүгээр сарын 1-нээс гэр хорооллын айл өрхийн шөнийн хэрэглээний цахилгааны үнийг тэглэсэн агаарт хаягдах хорт бодисын хэмжээг бууруулахад нөлөөлнө гэж эрх баригчид үзэж байгаа.

Агаарын бохирдлыг бууруулах Үндэсний комисс энэ жил таван тэрбум төгрөг буюу хоёр сая ам.долларыг зарцуулах бөгөөд үүний ихэнх хэсэг нь зуух солих, иргэдийг цахилгаан халаагуураар хангахад зарцуулагдана.

Гэрэл зургуудыг Ройтер агентлаг авчээ.

Бэлтгэсэн А.ТУЛГА

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна