Дэлхийн бөхийн холбоо чөлөөтийнхнийг ААШТ-д оролцуулахаар шийдвэрлэжээ

2017 оны 4 сарын 19

Монголын чөлөөт бөхийн тамирчдын мэдүүлэг цагтаа очоогүйгээс Ази тивийн аварга шалгаруулах тэмцээнд оролцох боломжгүй болох нөхцөл байдал үүсээд байсан.

Тэгвэл Дэлхийн бөхийн нэгдсэн холбооноос Монголын чөлөөт бөхийн холбооны хүсэлтийг хүлээн авч, манай тамирчдыг тивийн аварга шалгаруулах тэмцээнд оролцуулах шийдвэр гаргасан талаараа хариу ирүүлсэн байна. 

Бөхийн чөлөөт барилдааны Азийн аварга шалгаруулах тэмцээн Энэтхэгийн Дели хотноо тавдугаар сарын 10-14-нд болно. 

Тивийн аваргад өрсөлдөх тамирчдын нэрсийг яаралтай мэдүүлэхийг Дэлхийн бөхийн холбоо сануулсан тул яг одоо энэ асуудлаар Монголын чөлөөт бөхийн холбооны удирдлагууд болон багш, дасгалжуулагчид хуралдах гэж байна. 

Сануулахад, тэмцээний зааварт заасны дагуу урьдчилсан мэдүүлгийг гуравдугаар сарын 10-д өгч, тэмцээн эхлэхээс нэг сарын өмнө буюу дөрөвдүгээр сарын 10-нд багуудын нэрийн мэдүүлгийг хүлээн авах хугацаа дуусч, бүртгэлийн “Athena” систем хаагдсан тул тэмцээнд оролцох Монголын багийн мэдүүлгийг хүлээн авах боломжгүйг Дэлхийн бөхийн нэгдсэн холбооноос мэдэгдээд байсан юм.

Хэрэв Монголын тамирчдыг Азийн аваргад оролцуулахгүй байх шийдвэрээ Дэлхийн холбооноос хэвээр гаргасан бол манай тамирчид энэ жилийн Дэлхийн аварга шалгаруулах тэмцээнд оролцохгүй байх харамсалтай нөхцөл үүсэх байсан юм.

Б.ЭНХ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна