Ардчилсан Ерөнхийлөгч Ц.Элбэгдорж Авлигатай тэмцэх газрын шинэ удирдлагуудыг УИХ-д санал болгож, эрхэм гишүүд үг дуугүй хүлээн зөвшөөрсөн нь саяхан. Төрийн нэрийн өмнөөс үүрэг гүйцэтгэж, авлигын хана хэрмийг нураах хамгийн том тоглолтыг Элбэгээгийн илгээсэн нөхөд хийж байна. Гүйцэтгэх ажиллагааг тэд алдаатай хийсэн ч бай, үгүй ч бай “Эрх мэдэлтнүүд ч, энгийн иргэд ч хууль цаазад захирагдах ёстой” гэдгийг нийгэмд мэдрүүлэв. Энэ бол хамгийн том ололт. Харин энэ тоглолтыг үргэлжлүүлэх үүрэг Ардчилсан намынханд оногдлоо. Ирэх сонгуулиас урьтаж, Ардын намын дангаар бүрдүүлсэн Засгийн газраас нэг сайдыг огцруулахаар тэд төлөвлөчихсөн шүү дээ. Тиймээс нэгэнт нээгдсэн “хаалга”-аар дайраад ордог цаг. Хамгийн сонирхолтой нь Ардчилсан намынханд тэр том “хаалга”-ыг экс Ерөнхийлөгч Н.Энхбаяр өөрийгөө баривчлуулж, хорихын хүйтэн өрөөнд хоригдон байж нээлцээд өгчихлөө. Үнэг сүүлээ шарвадагтай адил “Авлигын загалмайлсан эцэг” гэгддэг энэ эрхэм Ц.Нямдоржийг намынхан дунд нь ганцаардуулж, сөрөг хүчний өмнө сульдаах ноцтой шалтгаан болов. Эрх баригч хүчний нөлөө бүхий лидерийг Хууль зүй, дотоод хэргийн сайдаас огцруулах шалтаг ч энэ мөн.
Ардын нам дахь Н.Энхбаярын фракцийнхан, Ардчилсан нам, МАХН, бас Ц.Шинэбаяр тэргүүтэй Хамуг Монголын Хөдөлмөрийн намынхан Ц.Нямдорж сайдын эсрэг хүч хавсарч байна. Н.Энхбаяр гэдэг том “тул”-ыг барьсан нь эрх баригчид, тэр тусмаа Төрийн ордныг бүхэлд нь доргиолоо. Экс Ерөнхийлөгчийг баривчилсан нь гудамжны жагсагчдыг сэрээгээд зогсохгүй УИХ дахь намуудын төлөөллийг байр сууриа нэгтгэж, Ц.Нямдорж, цаашилбал С.Батболдын багийг барьц алдуулж чадав. УИХ дахь Ардын намын бүлгийн гишүүн Д.Тэрбишдагва, Ч.Улаан, О.Чулуунбат нар энэ салхийг хагалж, “Намаасаа гарч, УИХ-д МАХН-ын бүлэг байгуулах эсэхээ ярилцаж байна” гэсэн нь нөхцөл байдлыг улам сонирхолтой болголоо. Учир нь тэд сэтгэлийн хөөрлөөр асуудлыг шийддэг улстөрч “жараахайнууд” биш. Монголын улс төрд МАХН гэдэг нам монопольчилж байхад тэд нөлөө бүхий лидерүүд нь явсан. МАХН хэмээх нэрийг Монгол ардын намын болгон өөрчилсний дараа ч мөн адил. Хэрэв тэд ирэх сонгуулиас өмнөхөн улс төрийн зориг гаргаж, “хөлөг онгоц”-ыг Н.Энхбаяртай хамт жолоодвол эрх баригч хүчинд эволюцийн өөрчлөлт эхлэх нь ойлгомжтой. Гэвч улс төрд хямрал нүүрлэх тусам улам нэгдэж, байр сууриа хүчирхэгжүүлдэг Ардын намын тактикийг үгүйсгэж болохгүй.
Н.Энхбаяр баривчлагдаж, Ц.Нямдорж огцорсон байлаа ч Ардчилсан нам нэмэх оноо авч чадахгүй байж мэднэ. Учир нь тэд эв түнжингүй, фракциуд нь сөргөлдөөнтэй, эрх мэдэл булаацалдсан хэвээр байна. Тэгээд ч Н.Алтанхуяг тэргүүтэй “Алтангадас”-ынхан “Шонхор” фракцийнхантай эрх мэдлээ хуваалцахаас өөр аргагүй боллоо. Ийм нөхцөл ч бүрдэв. Ардчилсан намын Үндэсний зөвлөлдөх хороо тун удахгүй хуралдана. Энэ үеэр хэлэлцэх нэгэн сонирхолтой сэдэв бол намын дэд даргатай болох тухай юм. Н.Алтанхуяг өөрийнх нь эсрэг хөдлөх фракциудын амбицийг дарахын тулд “Шонхор” фракцийн тэргүүн З.Энхболдыг дэд дарга болгохоор тохиролцжээ. Тэр ч бүү хэл сонгуулийн PR-аа ч түүнд хариуцуулахаар болсон байна. УИХ-ын гишүүн Х.Баттулга, З.Энхболд хоёр олон нийтийн дунд Н.Алтанхуягаас илүү рейтингтэй яваа тул Н.Алтанхуяг ийн буулт хийсэн биз. Тэгээд ч сонгууль хаяанд ирчихлээ шүү дээ. “Алтангадас” фракцийнхан Ардчилсан намд засгийн эрхийг барьж байгаа бол МоАХ, МҮДН-ын лидерүүдэд хамтарсан Засгийн газарт сайдаар ажиллах хувь тохиосон. Харин “Шонхор” фракцийн голлон тоглогчдын нэг Г.Баярсайхан УИХ-ын дэргэдэх Ёс зүйн дэд хорооны даргаар ажилладгийг эс тооцвол тэд тойргийн гадна үлдэж байсан юм. Тиймээс Н.Алтанхуяг “Шонхор” фракцийн тэргүүнд томоохон “бэлэг” барихаар шийджээ. Харин Н.Энхбаяр хорихын хүйтэн байшинг зүглэхдээ Ардчилсан намд өөр нэгэн “бэлэг”-ийг үлдээжээ. Тэр бол Ц.Нямдоржийг огцруулж, Ардын намын эмзэг цэгт хатгах тактик юм. Тэгвэл Ардчилсан намд хамгийн том сюрпризийг хэн барив. Мэдээж хэрэг, Ц.Элбэгдорж. Н.Энхбаяр гэдэг аварга том “тул”-ыг барьчихлаа шүү дээ.
"Улс төрийн тойм" сонин