ОХУ-ын нийслэл Москва хотноо жүдо бөхийн “Их дуулга” тэмцээн болж байна. Чансаа өндөр тус тэмцээний түрүү бөхөд чансааны 300 оноо олгох бол мөнгө, хүрэл медалийг 180, 120 оноо дагалдах юм.

Дэлхийн 34 орны 164 жүдоч оролцож буй Москвагийн “Их дуулга”-д манай улсаас эрэгтэй долоо, эмэгтэй дөрвөн жүдоч зодоглож буй. Тэмцээний хуваарийн дагуу өчигдөр эрэгтэйчүүдийн 60, 66, 73 кг, эмэгтэйчүүдийн 48, 52, 57, 63 кг-ын жингийн барилдаан болсноос Монголын жүдочид нэг мөнгө, дөрвөн хүрэл медаль хүртлээ.

Эрэгтэйчүүдийн 60 кг-ын жинд барилдсан ОУХМ Д.Төмөрхүлэг аваргын төлөөх барилдаанд Японы бөх Наохиса Такатод вазари үнэлгээгээр ялагдаж, мөнгөн медаль зүүсэн бол мөн тус жинд зодоглосон ОУХМ Г.Болдбаатар хүрэл медалийн эзэн болжээ. Түүнчлэн 66 кг-д ОУХМ С.Мияарагчаа, 73 кг-д ОУХМ С.Ням-Очир, эмэгтэйчүүдийн 63 кг-д ОУХМ Ц.Мөнхзаяа нар хүрэл медалийн тавцанд гарсан байна. Мөн жин өгсч, 52 кг-ын жинд хүч үзсэн ОУХМ М.Уранцэцэг, эрэгтэйчүүдийн 73 кг-д Г.Одбаяр нар медалийн төлөөх барилдаанд дийлдсэнээр шагналт тавдугаар байрт шалгарчээ.

Өнөөдөр үлдсэн жингийн барилдаанууд болох бөгөөд Монголын тамирчдаас эрэгтэйчүүдийн 81 кг-д Г.Түвшинжаргал, -100 кг-д Б.Тэмүүлэн, эмэгтэйчүүдийн 70 кг-д Ц.Наранжаргал, -78 кг-д П.Лхамдэгд нар зодоглоно.