ОХУ-ын Красноярск хотноо жүдо бөхийн насанд хүрэгчдийн олон улсын тэмцээн болж, Оросын мужууд болон Монгол, Узбекистаны жүдочид өрсөлджээ. Монголын жүдочдоос  эрэгтэйчүүдийн 60 кг-ын жинд ОУХМ Д.Амартүвшин (“Хилчин”), 66 кг-ын жинд ОУХМ Б.Хишигбаяр (“Женко”) нар алт, 90 кг-ын жинд ОУХМ Б.Жанчивдорж (“Хүч”) мөнгө, 81 кг-д залуу бөх Х.Цогтгэрэл (Алдар-МУБИС) хүрэл медаль хүртсэн байна. Харин эмэгтэйчүүдийн 52 кг-ын жинд хүч үзсэн “Женко” клубийн тамирчин Н.Саранзаяа мөнгөн медалийн эзэн болжээ. Баг тамирчдыг дасгалжуулагч Ш.Эрдэнэбилэг, У.Эрдэнэбаатар, П.Хаштогтох нар удирдан оролцлоо хэмээн Монголын жүдо бөхийн холбооноос мэдээллээ.