“Mongolian Mining Corporation”  (MMC)  эрсдэлийн менежментийг хэрэгжүүлэхээр удирдлага болон бүх охин компаниудад “Active Risk Manager” программыг нэвтрүүлжээ.  “Mongolian Mining Corporation” нь Монголоос сайн чанарын коксжих нүүрс олборлож, экспортолдог. Тус компани өмнө нь эрсдэлийг тооцоолох, бууруулах зэрэг арга хэрэглэдэг байжээ. Гэвч энэ арга нь цаг алддаг, хүчин чармайлт шаарддаг байсан гэнэ. Харин энэхүү программ нь хэрэглэхэд хялбар, энгийнээс гадна сайтар боловсруулсан олон улсад хүлээн зөвшөөрөгдсөн программ гэнэ.

“Active Risk Manager” программыг “MMC” корпорацийн хэмжээнд нэвтрүүлж байгаа тул бусад охин компаниуд болон тус компанийн дийлэнх  хувьцааг  эзэмшигч “MCS Holding” групп ч мөн нэвтрүүлэх юм байна. “Active Risk Manager” программыг нэвтрүүлсэн бусад үйлчлүүлэгчдийн дунд “Bechtel”, “Rio Tinto”, “Fortescue Metals Group” болон “Hancock Coal” зэрэг компаниуд байдаг гэнэ.

Монголын коксжих нүүрсний хамгийн том олборлогч, экспортлогч “Mongolian Mining Corporation” нь Тавантолгойн нүүрсний нөөцийн нэг хэсэг болох Ухаа худаг болон мөн л Өмнөговь дахь Баруун наран хэмээх коксжих нүүрсний ордоос нүүрс олборлодог. Тус компани 2010 онд Хонконгийн Хөрөнгийн биржид бүртгүүлж, хувьцаагаа гаргасан юм.