Олон жилийн цаасан дээр “хэвтсэн” V Дулааны цахилгаан станцын байршлыг судалж буй тухай Эрчим хүчний яамнаас мэдэгдэж байна. Байршлыг тогтоосны дараа усны хайгуул, инженер геодези, дулааны судалгаа хийхэд 6-8 сарын хугацаа шаардлагатай. Харин үүний дараа 30-40 сарын хугацаанд нийслэлийн эрчим хүчний тав дахь эх үүсвэрийг барьж, ашиглалтад оруулах гэнэ. Гэхдээ барилгын ажлыг 2013 онд багтааж эхлүүлнэ гэдэгт итгэл төгс байгаа тухай Эрчим хүчний дэд сайд Д.Доржпүрэв хэлэв.

"Ньюком" корпораци болон Японы "Sojitz", БНСУ-ын "Posco Energy", Францын "GDF Suez" компаниудын хамтарсан групп Улаанбаатар хотыг цахилгаан эрчим хүчээр хангах V цахилгаан станц барих төсөлд хөрөнгө оруулалт хийхээр болсон билээ.

ДЦС-5-аас гадна урт хугацаанд баригдах шинэ эрчим хүчний эх үүсвэрийн ажлууд эхэлсэн байна. Тухайлбал, тодорхой тооны хувийн хэвшилд 500 орчим мегаваттын салхин эрчим хүч үйлдвэрлэх зөвшөөрөл олгосны дагуу тэдгээр нь салхин парк байгуулах судалгаагаа хийж эхэлсэн байна.

Мөн Сэлэнгэ мөрний сав газарт усан цахилгаан станц барих зайлшгүй шаардлагатай гэдгийг салбарын дэд сайд хэлсэн. Импортын эрчим хүчний хараат байдалд байгаа манай нөхцөлд өглөө оройны ачааллыг тохируулахад усан цахилгаан станц чухал хамгийн тохиромжтой гэнэ.