МАХН-ын Гүйцэтгэх товчооны өнөөдөр болсон хурлаараа МАХН Засгийн газраас гарахгүй гэсэн шийдэлд хүрсэн талаар бид мэдээлсэн. Мөн МАХН-ын дарга Н.Энхбаяртай холбоотой асуудлыг МАХН-аас сонгогдсон ИТХ-ын төлөөлөгчдийн хүрээнд ярьжээ.

МАХН-аас сонгогдсон иргэдийн төлөөлөгчид “Н.Энхбаярт хүлээлгэж байгаа  хоёр хэрэг бол түүнтэй огт холбоогүй асуудал. Энэ бол хувьчлалын цаана байгаа, Н.Энхбаяр даргатай хамааралгүй,  хууль эрх зүйн хувьд  ямар ч боломжгүй асуудал. Тиймээс  үүнийг цагаатгах нь зүйтэй” гэсэн байр суурь илэрхийлжээ. Мөн Монгол Улсын Ерөнхийлөгчийн 2013 оны сонгуульд МАХН-ын дарга Н.Энхбаярыг нэр дэвшүүлэх нь ёстой гэсэн саналыг иргэдийн төлөөлөгчид илэрхийлжээ.

Өнөөдөр болсон МАХН-ын Гүйцэтгэх товчооны хурлаар эдгээр саналыг сонссон байна. Гэхдээ үүнийг албан ёсны хэлэлцүүлэх асуудал биш гэж үзжээ. Хуулийн дагуу Ерөнхийлөгчийн сонгуулийн тов зарлагдсан хойно л Ерөнхийлөгчийн сонгуульд Н.Энхбаярыг нэр дэвшүүлэх эсэх асуудлыг ярилцахаар болжээ. Ингээд өнөөдрийн хувьд зөвхөн Засгийн газраас МАХН  гарах эсэх тухай асуудлыг хэлэлцэн Засгийн газарт үлдэх шийдвэр гаргаснаар хурал өндөрлөв.