Монгол Улсын Ерөнхийлөгч Цахиагийн Элбэгдоржийн Бүгд Найрамдах Польш Улсад хийж буй Төрийн айлчлал эхэлж тус улсын Ерөнхийлөгч Бронислав Коморовски Ерөнхийлөгчийн ордны хүндэтгэлийн талбайд угтан авлаа.

13 жилийн дараа болж буй Монгол Улсын Ерөнхийлөгчийн Польш Улсад хийж буй айлчлалын бүрэлдэхүүнд УИХ-ын гишүүн, Гадаад харилцааны сайд Л.Болд, Монгол Улсаас БНПУ-д суугаа Онц бөгөөд Бүрэн эрхт Элчин сайд А.Ганбаатар, Ерөнхийлөгчийн Үндэсний аюулгүй байдал, гадаад бодлогын зөвлөх Л.Пүрэвсүрэн, Ерөнхийлөгчийн эрүүл мэнд, боловсрол, шинжлэх ухаан, технологийн бодлого шашны асуудлын зөвлөх Р.Болд, Сангийн дэд сайд С.Пүрэв, Барилга, хот байгуулалтын дэд сайд Г.Байгалмаа, Хүн амын хөгжил, нийгмийн хамгааллын дэд сайд О.Тамир нарын албаны хүмүүс, мөн бизнес, хэвлэл мэдээллийн байгууллагын төлөөлөгчид багтсан байна.
 
Хоёр улсын төрийн далбаа мандуулж торгон цэрэг жагссан хүндэтгэлийн талбайд Монгол Улс, Польш Улсын төрийн дуулал эгшиглэсний дараа хоёр орны төрийн тэргүүд ганцаарчилсан уулзалт хийлээ.