Монгол Улс боловсрол, шинжлэх ухаан, соёл, мэдээлэл, харилцаа холбооны салбарт Зүүн хойд Азийн орнуудтай хамтрахаар боллоо. Тодруулбал, Монгол Улс дээрх чиглэлээр дэлхийн орнуудыг эгнээндээ багтаадаг ЮНЕСКО-гийн гишүүн орон болоод 50 гаруй жилийг ардаа орхисон бөгөөд гуравдугаар сарын 1-нд ойн тэмдэглэлт арга хэмжээ болсон юм. Ийнхүү тэмдэглэлт ойн үеэр алдаа оноогоо дүгнэсэн бол цаашдаа Зүүн Азийн орнуудтай түлхүү хамтран ажиллахаар болсон байна. Эхний ээлжинд БНСУ-тай хамтран ажиллах санамж бичгийг энэ сард байгуулахаар талаар ЮНЕСКО-гийн Монголын үндэсний комиссоос мэдээллээ.
Сануулахад, тэртээ 51 жилийн өмнө 11 дүгээр сарын 1-нд Монгол Улс ЮНЕСКО(Нэгдсэн үндэстний Боловсрол, шинжлэх ухаан, соёлын байгууллага)-д 108 дэх гишүүн болж элсэн орж байсан юм. Ингэснээр Боловсрол, шинжлэх ухаан, соёл, мэдээлэл харилцаа холбооны салбараа дэлхийн түвшинд хөгжүүлэх, ЮНЕСКО-гийн шугамаар олон улсын хамтын нийгэмлэгийн тусламж дэмжлэг авах, хамтран ажиллах боломж бүрдсэн байна. Түүнээс жилийн дараа гуравдугаар сарын 1-нд ЮНЕСКО-гийн Дүрмийн VII зүйлийн дагуу ЮНЕСКО-гийн Монголын үндэсний комиссыг БНМАУ-ын Сайд нарын Зөвлөлийн тогтоолоор Гадаад Явдлын яамны дэргэд байгуулж байжээ.