Ипотекийн зээлийн ерөнхий нөхцөлийг тогтоох журам

Хуучирсан мэдээ: 2013.06.07-нд нийтлэгдсэн

Ипотекийн зээлийн ерөнхий нөхцөлийг тогтоох журам

Ипотекийн зээлийн ерөнхий журмын арилжааны банкуудад хүргүүлсэн
хувилбарыг танилцуулж байна. Харин энэ долоо хоногт Монголбанкнаас
нарийвчилсан журам гарах юм байна.


Орон сууцны Ипотекийн зээлийн ерөнхий нөхцлийг тогтоох журам


Нэг. Нийтлэг үндэслэл

1.1.
Энэ журмын зорилго нь Засгийн газрын 2013 оны 4 дүгээр сарын 13-ны
өдрийн 135 дугаар тогтоолыг үндэслэн Монгол Улсын иргэд /цаашид
“Зээлдэгч” гэх/-д олгох орон сууцны ипотекийн зээлийн ерөнхий нөхцлийг
тогтооход оршино.

1.2. Энэ журмаар олгох ипотекийн зээлийг
Монголбанкнаас тогтоосон зохистой харьцааны шалгуур үзүүлэлт, заавал
байлгах нөөцийн шаардлагыг ханган ажиллаж байгаа банкаар дамжуулан
олгоно.

1.3. Энэ журмын дагуу инженерийн дэд бүтэц (цахилгаан,
дулаан, ус, ариутгах татуурга, холбоо дохиолол)-д бүрэн холбогдсон, эрх
бүхий байгууллагын шийдвэрээр байнгын ашиглалтад орсон шинэ орон сууц
болон инженерийн дэд бүтэцэд бүрэн холбогдсон, барилгын техникийн хяналт
хэрэгжүүлэгч байгууллагын шийдвэрээр ашиглахыг хориглоогүй, ашиглагдаж
байгаа хуучин орон сууцыг худалдан авах хүсэлтэй Монгол Улсын иргэнд
орон сууцны ипотекийн зээлийг олгоно.

1.4. Энэ журмын дагуу олгох
ипотекийн зээлийн үйл ажиллагаа нь Монголбанкнаас баталсан “Ипотекийн
зээлийн үйл ажиллагааны журам”, түүнтэй нийцүүлэн баталсан бусад журам,
тухайн банкны өөрийн зээлийн үйл ажиллагаандаа мөрдөж байгаа журмын
дагуу хэрэгжинэ.

1.5. Энэ журам нь Ипотекийн санхүүжилтийн тогтолцооны бүрдэл хэсэг болно.

Хоёр. Зээлийн ерөнхий нөхцөл

2.1.
Зээлээр худалдан авах орон сууцны нийт талбайн хэмжээ “Орон сууцны
барилгын доторх сууцны талбай тооцох аргачлал” MNS 6058:2009 стандартын
дагуу тооцсоноор 80 м2-аас дээшгүй байна.

2.2. Ипотекийн зээлийн хугацаа нь 20 хүртэл жил байна.

2.3.
Ипотекийн зээлийн хүү жилийн 8 /±1/ хувьбайх бөгөөд жилийн инфляциас
хамаарч улиралд нэг удаа өөрчлөгдөж болно. Ипотекийн зээлийн хүү нь
Монголбанк, Засгийн газрын хооронд байгуулсан "Ипотекийн санхүүжилтийн
тогтвортой тогтолцоог бий болгох талаар хамтран ажиллах санамж
бичиг"-ийн хүрээнд батлах "Ипотекийн санхүүжилтийн тогтвортой тогтолцоог
бий болгох журам"-ын дагуу тодорхойлогдоно.

2.4. Орон сууцны
урьдчилгаа төлбөрийн хэмжээ орон сууцны үнийн дүнгийн 10-30 хүртэлх хувь
байна. Монголбанкнаас тогтоосон урьдчилгаа төлбөрийн хувь хэмжээнээс
бага хэмжээний урьдчилгаа төлбөр төлөх зорилтот бүлэгт үзүүлэх
хөнгөлөлтийн үйл ажиллагааг Засгийн газар тусгайлан тодорхойлж,
хэрэгжүүлэх ажлыг зохион байгуулна.

2.5. Зээлдэгч өөрийн өмчлөлд
байгаа хуучин орон сууцыг барьцаа болгон зээл авч, энэ журмын дагуу
олгох орон сууцны ипотекийн зээлийн урьдчилгаа төлбөрийг төлж болно.

2.6.
Өр, орлогын харьцаа нь Монголбанкнаас баталсан “Ипотекийн зээлийн үйл
ажиллагааны журам”-д зааснаар татварын өмнөх орлогын 45 хувиас ихгүй
байна.

2.7. Зээлийн барьцаа нь энэ журмын 2.5-д заасан хуучин
орон сууц болон энэ журмын дагуу олгосон зээлээр худалдан авах орон сууц
байна.

2.8. Зээлийн гэрээнд тусгаснаар зээлдэгч зээлийн урьдчилан төлөлт хийж болно.

2.9. Энэ журмаар олгох зээл нь бүрэн хорогдох, тогтмол хүүтэй зээл байна.

2.10.
Орон сууцны ипотекийн зээл олгож эхэлснээс хойш 7 сарын хугацаанд банк
өмнө нь олгосон орон сууцны ипотекийн зээлийг энэ журмын дагуу олгох
орон сууцны ипотекийн зээлд шилжүүлэх, зээлийн дахин санхүүжилт хийхийг
хориглоно.

2.11. Банк зээлийн дахин санхүүжилт хийхдээ дараахь зарчмыг баримтална:

2.11.1. дахин санхүүжилтийн хэмжээ өмнөх орон сууцны ипотекийн зээлийн өрийн үлдэгдлээс ихгүй байх;

2.11.2.
дахин санхүүжилт хүсэгч зээлдэгч нь зээлийн нөхцөлийн болон зээлдэгчийн
шалгуур, барьцаа хөрөнгийн шалгуурыг тус тус хангасан байх;

2.11.3.
дахин санхүүжилт хүсэгч зээлдэгч нь сүүлийн 6 сарын хугацаанд зээлийн
сайн түүхтэй, зээлийн эргэн төлөлт нь хэвийн ангилалд байх;

2.11.4. дахин санхүүжилтээр олгож байгаа орон сууцны ипотекийн зээл нь бүрэн хорогдох, тогтмол хүүтэй байх.

2.12.
Энэ журмын 3.1.3, 3.1.4-д заасны дагуу олгосон орон сууцны ипотекийн
зээлийн өрийн үлдэгдлийг энэ журмын дагуу олгох зээлийн эх үүсвэрээр
дахин санхүүжүүлэхгүй.

2.13. Нийтийн зориулалттай орон сууцны ипотекийн зээлээс бусад ипотекийн зээлийг дахин санхүүжүүлэхгүй.

Гурав. Зээлдэгчид тавих шалгуур үзүүлэлт

3.1. Энэ журмын дагуу орон сууцны ипотекийн зээл авах хүсэлт гаргаж байгаа иргэн дараахь шаардлагыг хангасан байна:

3.1.1. Монгол Улсын иргэн, 18 нас хүрсэн, эрх зүйн бүрэн чадамжтай байх;

3.1.2.
банк, санхүүгийн байгууллагад хугацаа хэтэрсэн, чанаргүй зээлийн өргүй,
шүүхийн шийдвэрийн дагуу төлөх өр, төлбөргүй байх;

3.1.3.
өрхийн[1] гишүүний аль нэг нь Засгийн газрын 2009 оны 368 дугаар
тогтоолоор баталсан “Төрийн албан хаагчдыг орон сууцны зээлд хамруулах
журам”-ын дагуу авсан орон сууцны ипотекийн зээлийн өрийн үлдэгдэлгүй
байх;

3.1.4. өрхийн гишүүний аль нэг нь Зам, тээвэр, барилга, хот
байгуулалтын сайд (хуучнаар), Сангийн сайд, Нийслэлийн Засаг даргын
2012 оны 45/49/А-108 дугаар хамтарсан тушаал, захирамжаар баталсан
“Иргэдийг жилийн 6 хувийн хүүтэй орон сууцны хөнгөлөлттэй зээлд
хамруулах харилцааг зохицуулах журам”-ын дагуу авсан орон сууцны
ипотекийн зээлийн өрийн үлдэгдэлгүй байх.

3.2. Энэ журмын дагуу олгох ипотекийн зээлийн барьцаа болох орон сууц нь дараахь шаардлагыг хангасан байна:

3.2.1. Монгол Улсад байршилтай, зөвхөн нийтийн зориулалттай орон сууц байх;

3.2.2. нийт талбай нь 80 м2-аас дээшгүй орон сууц байх;

3.2.3.
Монголбанкнаас баталсан “Ипотекийн зээлийн үйл ажиллагааны журам”-д
заасны дагуу хөрөнгийн болон амь насны даатгалд хамрагдсан байх;

3.2.4.
үл хөдлөх хөрөнгийн улсын бүртгэлд бүртгэгдсэн, эд хөрөнгө өмчлөх болон
эд хөрөнгийн бусад эрхийн талаар гуравдагч этгээдэд шаардах эрх
үүсээгүй байх;

3.2.5. барьцаалбар үйлдсэн байх;

3.2.6.
банк ипотекийн зээлийн барьцаа болж байгаа орон сууцны чанар, ашиглалтын
байдал, барьцаагаар үүргийн гүйцэтгэл хангуулах нөхцөлтэй холбоотой
нэмэлт шаардлага тавих эрхтэй байна.

Дөрөв. Бусад

4.1.
Энэ журмын хэрэгжилтэд орон сууцны асуудал хариуцсан төрийн захиргааны
төв байгууллага, сангийн асуудал хариуцсан төрийн захиргааны төв
байгууллага, эдийн засаг, хөгжлийн асуудал хариуцсан төрийн захиргааны
төв байгууллага тус тус хяналт тавьж ажиллана.

4.2. Энэ журмын
заалттай холбоотой маргааныг талууд харилцан тохиролцож шийдвэрлэх
бөгөөд нэгдсэн шийдвэрт эс хүрвэл Монгол Улсын шүүхээр шийдвэрлүүлнэ.

4.3. Энэ журмыг зөрчсөн этгээдэд Монгол Улсын хууль тогтоомжид заасны дагуу хариуцлага хүлээлгэнэ.

NewsMN Гар утасны хувилбар Татах
NEWS.mn

Мэдээллийн эх сурвалж