Зээлийн батлан даалтын сан дөрөвдүгээр сарын 11-нд үйл ажиллагаагаа эхлүүлсэн бол анхны батлан даалтаа гаргасан байна. Банкны шаардлагыг хангасан ч барьцаа хөрөнгө нь хангалтгүйгээс болоод зээл авч чадахгүй байгаа аж ахуйн нэгж, иргэдийг дэмжих уг сан энэ удаад барилгын материалын үйлдвэрлэл эрхэлдэг компанид 250 сая төгрөгтэй тэнцэх хэмжээний батлан даалт гаргасан тухай албаныхан мэдээллээ. Тус компани нь хөөсөнцөр хавтан үйлдвэрлэдэг ба Зээлийн батлан даалтын сан болон арилжааны банкны шалгуурыг хангаж, нэг аж ахуйн нэгж, хүмүүст гаргах батлан даалтын дээд хэмжээгээр батлан даалгаж, “Капитал” банкнаас зээл авсан байна.

Зээлийн батлан даалтын сан энэ жилдээ нийт 50 хүртэлх тэрбум төгрөгийн батлан даалт гаргах бөгөөд эхний ээлжинд Төрийн банк, “Голомт” банк, “Капитал” банктай хамтран ажиллаж байна.

Зээл авах үе шатыг танилцуулбал, зээл хүсэгч нь хамгийн эхлээд арилжааны банкинд дээрх гэрчилгээ болон банкнаас шаарддаг бүх бичиг баримтыг бүрдүүлэн өгнө. Ингэхээр Зээлийн батлан даалтын сан зээлд хавсран оролцож буйн утга учир үүнд гарч, банкны бусад шаардлагыг хангасан ч барьцаа хөрөнгө нь хангалтгүй байгаа ч зээл авах боломжтой болжээ. Ингэхдээ 60 хүртэлх хувийн буюу нэг зээлд гаргах батлан даалтын хэмжээ 250  сая төгрөгөөс хэтрэхгүй байх бөгөөд эргэлтийн хөрөнгийн, хөрөнгө оруулалтын, бичил зээлийн гэсэн гурван төрөлтэй аж. Батлан даалтын хугацаа нь авсан зээлийн хугацаатай ижил байх бөгөөд батлан даалт хүсэгч нь шимтгэл, хураамж төлөх юм байна. Тухайлбал,

• 1 жил хүртэл хугацаанд 1.0%
• 1-2 жил 2.0 %
• 2-оос дээш жил 3.0 хувиар батлан даалтын хэмжээнээс тооцон нэг удаа төлөх ажээ.