Хөвсгөл аймгийн Мөрөн суманд өнгөрсөн сарын эхээр найман настай охиныг хүчиндэж, цусыг нь юүлж, мөчлөөд цүнхэнд хийн хаясан аймшигт хэрэг гарсан. Талийгаач охин дөрвөн хүүхэдтэй айлын дээрээсээ хоёр дахь нь байжээ. Одоогоос сар гаруйн өмнө гэртээ ээждээ эрхэлж, инээж баясч явсан жаахан охин  зэрлэг балмад гэмт хэргийн золиос болж, наймхан насандаа хорвоог орхисон юм. Өглөө сургуульдаа явлаа хэмээн гарсан охины цогцсыг аймгийн хүнсний захаас олж,  хэрэгтэнг шуурхай олох зорилгоор ЦЕГ-ын  даргын тушаал гарч ЭЦГ болон ЦЕГ-аас ажлын хэсэг томилогдон тус аймагт ажилласан билээ. Албаны хүмүүс шуурхай эрэн сурвалжилсны эцэст тус аймгийн 28 настай М гэгчийг өнгөрөгч сарын 21-22-нд шилжих шөнө саа­туулсан юм. Сэжигтнийг аймгийн Цагдаагийн хэлтэст эрүү үүсгэн шалгаж эхэлжээ.

Сэжигтэн  Хөвс­гөл аймгийн цагдаагийн газрын өөдөөс харсан  орон сууцыг хөлс­лөн амьдарч байжээ. Уг хэрэгт сэжиглэгдэж бай­гаа залуу 28 настай, Мөрөн сумын уугуул, 1982 онд төрсөн Н.Мөнх-Ор­гил гэгч аж. Мөрөн сумын иргэ­дийн олонхи нь түүнийг тань­даг бөгөөд  тэрбээр 1999-2002 онд "Тусгалт гангар" гэрэл зургийн төвд зураг­чин хийдэг байжээ. Мөн "Одод эндээс төрнө" теле­визийн шоунд Хөвсгөл аймгийг төлөөлөн 2005 онд оролцож байсан аж.

Хэрэг гарсан өдрөөс хойш цагдаагийнхан Мө­рөн сумын олон иргэнээс байцаалт авч эрэн сур­валжилсан байна. Энэ үеэр мэ­дээл­лийг мөнгөөр худалдаж авна гэсэн мэдээлэл цацсан аж. Энэ мэдээлэл цацагд­санаас хойхно нэгэн иргэн хэрэг гарсан өдөр буюу тав­дугаар сарын 3-нд 12.10 цагийн үед талий­гаач охиныг сэ­жиг­тэн Н.Мөнх-Оргил  хөт­лөөд явж байс­ныг хар­сан хэ­мээн мэ­дүүл­жээ. Мэдээллийн дагуу Н.Мөнх-Оргилыг айм­гийн цаг­даагийн газ­рынхан гэртээ байхад  нь баривчилсан.

Хэрэгт хол­богдох баримт, талийгаач охины биеэс илэрсэн үрийн шингэн болон охи­ны цогцос дээрх хурууны хээ түү­нийхтэй таарчээ.  Хохирогчын цогцсыг хийсэн байсан АDIDAS цүнхийг Н.Мөнх-Орги­лынх болохыг гэрчүүд но­толсон байна. Цагдаагийн ажилт­нууд энэ мэт эргэлзээгүй нотлох баримттайгаар сэжигтнийг саатуулсан гэж байгаа ч Н.Мөнх-Оргил  өнөөг хүртэл  хэргээ  хү­лээхгүй байгаа аж. Одоо бол сэжигтэн М-ийг Ганц худагт саатуулан мөрдөн байцаах ажил үргэлжилж байгаа юм. Хэрэг гарснаас хойш багагүй хугацаа өнгөрсний дараа сэжигтэнг барьж саатуулсан. Бараг хэрэг хуучрах дөхөж байхад хэн нь үл мэдэгдэх залууг сэжигтнээр татан, хүчээр хэрэг хүлээлгэх гэлээ гэсэн үнэн худал нь мэдэгдэхгүй үгс ч хаа нэгтээ дуулдах болсон юм. Цагдаагийхны сэжиглэн хорьсон сэжигтэн М нь  нийгмийн идэвх сайтай, нутаг усандаа нэртэй залуу байсан гэж байгаа. ДНК-гийн шинжилгээний хариу гарсан, мөн 4-5 гэрч гарч ирсэн гээд маш олон нотлох баримт шалгалтын үеэр дахин гарч ирсээр байгаа аж.  

Энэ хэргийг шалгахад маш олон зүйлийг үндэслэж иргэн М-ын сэтгэл зүйг хууль зүйн талаас нь судалж, бага нас, сурсан сургууль гээд эргэн тойрных нь бүх зүйлийг шалгаж байгаа юм байна. Хууль хяналтын байгууллагынхан хуулийн хүрээнд өөрсдийнхөө ажлыг хийж байгаа хэрэг мөрдөн байцаалтын шатандаа яваа гэж Цагдаагийн Ерөнхий газрын хурандаа Т.Сайнжаргал хэлж байна. 

П.Наран