Монгол Улс, Швейцарийн Холбооны Улсын Засгийн газар хооронд байгуулсан хэлэлцээрийн дагуу Засаглалыг дэмжих, төвлөрлийг сааруулах хөтөлбөрийн 2 дахь үе шатны хүрээнд Иргэдийн оролцоо төслийг хамтран хэрэгжүүлэхээр талууд гарын үсэг зурлаа.

Швейцарийн хөгжлийн агентлагийн санхүүгийн дэмжлэгтэйгээр хэрэгжүүлж буй Засаглалыг дэмжих, төвлөрлийг сааруулах хөтөлбөрийн 2 дахь үе шатны гол зорилго нь төрийн захиргааны байгууллагуудын чиг үүрэг, хариуцлага ба захиргааны эрх мэдэл нь тодорхой, эдгээрт тохирсон санхүүжилттэй, орон нутгийн удирдлага нь улс төрийн болон бодлогын өрсөлдөөнт сонгуулиар сонгогддог, төрийн үйл хэрэгт иргэд шууд оролцох боломжтой, орон нутгийн удирдлагын шийдвэр, үйл ажиллагаа нь ил тод, нээлттэй, иргэд мэдээллийг хялбар авах боломжтой байх явдлыг дэмжих юм.

Хөтөлбөр нь Орон нутгийн засаглал, Хотын засаглал, Төвлөрлийг сааруулах бодлогын дэмжлэг болон Иргэдийн оролцоо гэсэн дөрвөн бүрэлдэхүүн хэсэг буюу төслүүдээс бүрдэж байгаа. Хөтөлбөрийн хүрээнд Монгол Улсын Ерөнхийлөгчийн Тамгын газраас “Иргэдийн оролцоо” төслийг хэрэгжүүлэх юм.

Төслийн хүрээнд төрийн үйл ажиллагаа, тэр дундаа өөрсдийн амьдралтай холбоотой орон нутгийн шийдвэр гаргах үйл явцад иргэдийн оролцоог хангахад чиглэсэн хууль эрх зүйн нэгдмэл, цогц орчинг бүрдүүлэх ажлыг ЕТГ манлайлан, төр засгийн бусад байгууллагуудтай хамтран хэрэгжүүлнэ. Иргэдийн оролцоо нэмэгдсэнээр орон нутгийн засаг захиргаа нь тэдний хэрэгцээ шаардлагад илүү нийцсэн шийдвэр гаргадаг болох зорилготой.

Эх сурвалж: www.president.mn