Хөгжлийн бэрхшээлтэй иргэдийн аюулгүй байдлыг хангана

Хуучирсан мэдээ: 2015.11.04-нд нийтлэгдсэн

Хөгжлийн бэрхшээлтэй иргэдийн аюулгүй байдлыг хангана

Хөгжлийн бэрхшээлтэй иргэдийн аюулгүй байдлыг хангах, аюулт үзэгдэл техникийн холбогдолтой ослын үед хэрхэн авран хамгаалах чиглэлээр нийслэлийн Онцгой байдлын газраас өнөөдөр Хараагүйчүүдийн үндэсний холбоотой хамтран  сургалт дадлагыг зохион байгууллаа.

Нийслэлийн удирдлагууд “Хөгжлийн бэрхшээлтэй иргэдтэй зөвлөлдөх уулзалт”- ыг  2015 оны 10 дугаар сарын 21-ний өдөр зохион байгуулж уулзалтаас хөгжлийн бэрхшээлтэй иргэдийн ажиллаж амьдрах нөхцөлийг хангахад чиглэгдсэн санал, санаачлагууд гарсан. Тухайлбал төрийн үйлчилгээний байгууллагууд ажлын 7 хоногийн 3 дах өдөр бүрийг хөгжлийн бэрхшээлтэй иргэдийг хүлээн авдаг өдөр болгох, нийслэлийн Засаг Даргын дэргэд хөгжлийн бэрхшээлтэй иргэдийн асуудал хариуцсан зөвлөл байгуулах, мөн 2016 оны төсөвт НЗДаргын дэргэд хөгжлийн бэрхшээлтэй иргэний асуудал хариуцсан байнгын ажиллагаатай алба байгуулах зэрэг санал санаачлагууд гарч хэрэгжүүлэх шатандаа байгаа билээ.

Нийслэлийн Онцгой байдлын газраас жил бүр хараагүй иргэдийн байгууллагатай хамтран аюулгүй байдлыг хангах чиглэлээр сургалт сурталчилгааны ажлыг зохион байгуулдаг.

Монголын хараагүйчүүдийн үндэсний холбоо, сургалт арга зүйн төв, эсгийний үйлдвэр, цаасан уутны үйлдвэр, мужааны цех, хэвлэх үйлдвэр, 25, 29, 70 дугаар тусгай сургуулийн 309 ажилтан,  53 багш, 269 хүүхэд нийт 631хүн оролцуулан гамшгаас урьдчилан сэргийлэх танхимын сургалт явуулж, гамшгийн үед аюулгүй зай талбайд гарах биет дадлагыг Монголын хараагүйчүүдийн үндэсний холбооны байр, 25, 29, 70 дугаар тусгай сургуулийн байранд нийслэлийн аврах ангийн 2 авто машин 9 албан хаагч, Хан-Уул дүүргийн Онцгой байдлын хэлтсийн аврах гал унтраах 14 ангийн 2 авто машин 13 албан хаагч, Сүхбаатар, Баянгол дүүргийн Гал түймрийн улсын хяналтын ахлах байцаагч, гал түймрийн улсын хяналтын байцаагч сургалт сурталчилгаа урьдчилан сэргийлэх асуудал хариуцсан мэргэжилтэн нартай хамтран зохион байгуулан ажиллалаа.

Дадлага сургуулийн зорилго нь хөгжлийн бэрхшээлтэй иргэд, тусгай сургуулийн сурагч, хүүхдүүдэд гамшиг ослын  талаарх мэдлэг олгох, гамшгийн аюулын тухай зарлан мэдээллийн дохио хүргэх, дохиогоор ажиллах дадлага эзэмшүүлэхэд чиглэгдэж байлаа гэж Нийслэлийн Онцгой байдлын газраас мэдээллээ.

 

NewsMN Гар утасны хувилбар Татах
NEWS.mn

Мэдээллийн эх сурвалж