Л.Пүрэвсүрэн Европын комиссын Дэд ерөнхийлөгчтэй уулзав

2015 оны 11 сарын 5

Энэ оны 11 дүгээр сарын 4-нөөс 6-ны өдрүүдэд Люксембургийн Их Гүнт Улсад болж буй Ази, Европын уулзалт /АСЕМ/-ын Гадаад хэргийн сайд нарын 12 дугаар хуралдаанд оролцож буй Гадаад хэргийн сайд Л.Пүрэвсүрэн 11 дүгээр сарын 4-ний өдөр Европын комиссын Дэд ерөнхийлөгч бөгөөд Гадаад хэрэг, аюулгүй байдлын асуудал хариуцсан Дээд төлөөлөгч Федерика Могеринитэй уулзав.

Уулзалтын эхэнд сайд Л.Пүрэвсүрэн ирэх онд Монгол Улсад зохион байгуулагдах АСЕМ-ын Дээд хэмжээний уулзалтын бэлтгэлийг хангахад Европын Холбооны зүгээс дэмжлэг туслалцаа үзүүлэн хамтран ажиллаж байгаад талархал илэрхийлээд  манай улсын чухал “гуравдагч хөрш” болохын хувьд Монгол Улс Европын Холбоотой тогтоосон харилцаанд ихээхэн ач холбогдол өгч бүхий л талаар өргөжүүлэн хөгжүүлэхийн төлөө байдгаа онцлон тэмдэглэж, Европын Холбоотой байгуулсан Түншлэл, хамтын ажиллагааны хэлэлцээрийг тус холбооны бүх гишүүн орнуудаар соёрхон батлуулахыг хурдавчлахад дэмжлэг үзүүлэх, хоёр талын худалдаа, эдийн засгийн хамтын ажиллагааг эрчимжүүлэн Монгол Улсын эдийн засгийг төрөлжүүлэн солонгоруулахад Европын Холбооны гишүүн орнуудын хувийн хэвшлийн хөрөнгө оруулалтыг нэмэгдүүлэхэд анхаарахыг хүсэв.

Түүнчлэн сайд Л.Пүрэвсүрэн Монгол Улсын Байнгын төвийг сахисан бодлого, Зүүн Хойд Азийн аюулгүй байдлыг хангах талаар авч хэрэгжүүлж байгаа арга хэмжээнүүд зэрэг Монгол Улсын гадаад бодлогын санаачлага, үйл ажиллагааны талаар танилцуулж, Дэд ерөнхийлөгч Ф.Могеринитэй хоёр талын харилцан сонирхсон олон улсын харилцааны асуудлаар санал солилцлоо.

ЭХ СУРВАЛЖ: ГАДААД ХЭРГИЙН ЯАМ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна