"Хакүхо цом" тэмцээний бүртгэл өнөөдөр дуусна

2015 оны 11 сарын 6


 

Мэргэжлийн сүмо бөхийн Их аварга Хакүхо М.Даваажаргалын нэрэмжит "Хакүхо цом" сүмо бөхийн өсвөр үеийн аварга шалгаруулах тэмцээн ирэх ням гаригт буюу арваннэгдүгээр сарын 8-ны өдөр Спортын төв ордонд болно. "Хакүхо цом" өсвөрийн сүмочдын тэмцээнийг “Хакүхо сан”-гаас санаачлан зургаа дахь жилдээ зохион байгуулах гэж байна.

Их аваргын ивээл дор явуулдаг, “Эрүүл монгол хүүхэд"-ийн төлөө уриатай тэмцээнийг “Хакүхо сан”, Их Шавийн дээд сургууль хамтран зохион байгуулж байгаа бөгөөд тэмцээнд оролцогчид 8, 9, 10, 11, 12, 13-15 гэсэн зургаан насны ангиллаар өрсөлдөнө. 13-15 насны ангилалд 2000 оны 2 сараас хойш төрсөн хүүхдүүд оролцох боломжтойг анхаараарай.

Энэхүү тэмцээний бүртгэл өнөөдрийн 18.00 цаг хүртэл Их шавийн дээд сургуульд явагдаж байна. Тэмцээний техникийн зөвлөгөөний хурал маргааш буюу арваннэгдүгээр сарын 07-нд 15:00 цагаас Их шавийн дээд сургуулийн байранд болно.

Тэмцээнд өрсөлдсөн өсвөрийн тамирчдаас Текниктэй бөх, Дайчин бөх, Уран барилдааны шагналтан тодруулна. Улмаар нас насны ангилалд медальт байр эзэлсэн болон амжилттай барилдсан хүүхдүүдийг бэлтгэлд хамруулж, 2016 оны хоёрдугаар сард Японы Токио хотноо зохиогдох "HAKUHO CUP" олон улсын тэмцээнд оролцох найман хүүхдийг сонгон шалгаруулах юм.

Холбоо барих утас: 8811-6369, 9689-1151

Ч.БОЛОР

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна