Нээлттэй дуудлага худалдаагаар газар олгоно

2015 оны 11 сарын 8

Нийслэлийн Засаг дарга дуудлага худалдаагаар газар эзэмшүүлэх, ашиглуулах эрх олгох, газрын байршлыг тогтоох тухай захирамж гаргалаа. Захирамжийн дагуу нийслэлийн 2015 оны газар зохион байгуулалтын төлөвлөгөөнд тусгагдсан байршлуудад газар эзэмших, ашиглах эрхийн дуудлага худалдаа явуулах юм байна. Эдгээр нь Хан-Уул дүүргийн 10 дугаар хорооны нутаг дэвсгэрт байрлах "Чингис хаан" олон улсын нисэх буудлын ойролцоо үйлчилгээтэй орон сууцны зориулалтаар 13.76 га талбай бүхий дөрвөн газар, амины орон сууцны зориулалтаар 5.83 га газрыг хамруулсан байна. Мөн орон сууцны зориулалтаар гурван байршилд нийт 2.8 га газрыг дуудлага худалдаанд оруулахаар төлөвлөжээ. Газар эзэмшүүлэх, ашиглуулах эрхийн нээлттэй дуудлага худалдааг 2015 онд багтаан зохион байгуулах бол тухайн газарт баригдах барилгын архитектур төлөвлөлтийн даалгавар, инженерийн дэд бүтцийн төлөвлөлтийн шийдлийг тодорхойлсон баримт бичиг батлагдах ёстой юм.

Т.НОМИН

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна