Хот хоорондын нийтийн зорчигч тээврийн үйлчилгээг 43 аж ахуйн нэгж, байгууллага гэрээгээр хийж гүйцэтгэж байгаа бөгөөд 924 тээврийн хэрэгсэл ашиглаж байгаа ажээ. 10 дугаар сарын байдлаар зорчигч тээвэрлэлт жилийн өмнөхөөс 5 хувиар буурсан үзүүлэлттэй гарсан байна. Зам, тээврийн яамны бодлогын хүрээнд хот хоорондын нийтийн тээврийн үйлчилгээг хоёр аймагт дунд оврын, бусад аймгуудад том оврын, орчин үеийн тохилог автобусаар гүйцэтгэж байна. Ялангуяа Улаанбаатар-Хөвсгөл аймгийн чиглэлд нийтийн зорчигч тээврийн үйлчилгээнд том оврын унтлагын автобус явуулж эхэлснийг Авто тээврийн үндэсний төвөөс онцоллоо. Мөн тээвэрлэлт гүйцэтгэж байгаа тээврийн хэрэгслүүдэд “GPS” төхөөрөмж суулган тээвэрлэлтийн үйл явцыг хянаж чаддаг болжээ. Харин улс хоорондын авто тээврийн хувьд ачаа тээвэрлэлт гүйцэтгэх 120 аж ахуйн нэгжийн 3940 хүнд даацын автомашинаар тээвэрлэлт гүйцэтгэж байгаа ч тээвэрлэж буй бүтээгдэхүүний хэмжээ буурсаар байгаа аж. Тухайлбал 10 дугаар сарын эхний долоо хоногийн байдлаар жилийн өмнөхтэй харьцуулахад газрын тосны тээвэрлэлт 13.3 хувиар, зэсийн баяжмалынх 17.4 хувиар өссөн бол нүүрснийх 26.8 хувиар, төмрийн хүдрийнх 50.3 хувиар огцом буурсан байна. Одоогоор Өмнөговь аймгийн Гурвантэс сумын нутаг дахь Нарийн сухайт, Овоот толгойн уурхайгаас Шивээ хүрэн-Сэхээгийн боомтоор нүүрс экспортлох авто замыг хүнд даацын, гурван урсгалтай хатуу хучилттай болгож тээвэрлэлтийн сөрөг нөлөөллийг бууруулсаныг албаныхан мэдээлж байна. Харин улс хоорондын жуулчин тээвэрлэлтийг 97 байгууллага гүйцэтгэж байгаа бөгөөд Улаанбаатар-Дорноговь-Замын-Үүдийн шинэ чиглэл нээгдээд байгаа юм. Хамгийн сүүлд Авто тээврийн үндэсний төвөөс БНХАУ-ын Тяньжин хүртэл тээвэрлэлт хийхээр төлөвлөж байгааг мэдээллээ.

Т.ДАВАА