Гамшиг судлалын хүрээлэнг нэгтгэхгүй боллоо

2015 оны 11 сарын 11

УИХ-ын чуулганы нэгдсэн хуралдааныг түр завсарлуулж, энэ хооронд УИХ-ын Нийгмийн бодлого, боловсрол, соёл, шинжлэх ухааны байнгын хороо хуралдан тодорхой саналуудаа оруулж ирснээр чуулганы хуралдаан үргэлжилж байна.

Чуулганы хуралдаанаар Монгол Улсын 2016 оны төсвийн төслийн хоёр дахь хэлэлцүүлгийг хийж буй юм. Энэ хүрээнд санал хурааж байна. Тухайлбал, “Нэг эмнэлэг, хоёр жигүүр” төслийг хэрэгжүүлэхийн тулд 2.8 тэрбум төгрөгийг төсөвт суулгах санал гишүүдийн 89 хувийн дэмжлэг хүлээлээ. Ингэснээр Төрийн ордны баруун талд байрлах обьект эмнэлэг хэвээр үлдэж, ингэхдээ нэгдсэн нэгдүгээр эмнэлгийн амбулаторын корпус болохоор болж байна.

Мөн Гамшиг судлалын хүрээлэнг Онцгой байдлын ерөнхий газарт нэгтгэхгүй, үүнтэй холбоотойгоор зардал болох 100 гаруй сая төгрөгийг нэмж төсөвт суулгах санал гишүүдийн олонхийн дэмжлэг хүлээлээ.

Завхан аймгийн Их уул сум, 4.5 тэрбум төгрөгийн өртөгтэй сургуулийн барилгын 1.5 тэрбумыг төсөвт хэвээр үлдээх санал гишүүдийн 87.5 хувийн саналаар дэмжлэг хүлээлээ.


17.50

Д.Эрдэнэбат: Саналаа татахгүй

УИХ-ын чуулганы нэгдсэн хуралдаанаар Монгол Улсын 2016 оны төсвийн хуулийн төслийн хоёр дахь хэлэлцүүлгийг хийх шатанд Төсвийн байнгын хорооноос оруулж ирсэн зарчмын зөрүүтэй саналын томъёоллоор санал хураалгаж байна.

Тухайлбал, Уул уурхайн сайдын багцыг 5 тэрбум төгрөгөөр нэмэх санал гишүүдийн 75 хувийн дэмжлэг хүлээсэн бол АСЕАМ-ын аюулгүй байдлыг хангахад зориулж тоног төхөөрөмж шинэчлэх зориулалаар 13 тэрбум төгрөгийг төсөвт суулгахыг гишүүдийн 73.4 хувь нь дэмжлээ.

Харин Говийн бүсийн газрын тосны үйлдвэр байгуулах ТЭЗҮ боловсруулах зардлыг төсөвт суулгах санал дэмжлэг хүлээсэнгүй уналаа. Үүнд нийт 1.8 тэрбум төгрөг шаардлагатай юм байна. Санал хураахын өмнө УИХ-ын гишүүн, Аж үйлдвэрийн сайд Д.Эрдэнэбат “Нефть боловсруулах үйлдвэр байгуулах ажлыг олон жил гацааж ирсэн. ТЭЗҮ хийхэд шаардлагатай хөрөнгийн зардлыг УИХ-ын Төсвийн байнгын хорооноос байгуулагдсан ажлын хэсэг хасч оруулж ирж, УИХ гацааж байгаад шүүмжлэлтэй хандаж байна. УИХ бодлогынхоо эсрэг шийдвэр гаргаж болохгүй. ТЭЗҮ хийхэд шаардлагатай хөрөнгийн зардлыг хасахынхаа оронд хэрэггүй барилгын хөрөнгө оруулалтын зардлыг хасах ёстой” гэв.

УИХ-ын дарга З.Энхболд “Саналаа татаад авчих хэрэгтэй юм биш үү” гэсэнд УИХ-ын гишүүн, Аж үйлдвэрийн сайд Д.Эрдэнэбат “Саналаа би татаж авахгүй, саналыг санал хураагаад шийдэцгээ” гэж байлаа.

Сулинхээрийн отрядыг Улаанбадрах сум руу нүүлгэхэд шаардлагатай 2 тэрбум төгрөгийг төсөвт нэмж суулгах санал гишүүдийн олонхийн дэмжлэг хүлээлээ. УИХ-ын гишүүн Ц.Нямдоржийн тайлбарласнаар бол тус цэргийн отрядыг нүүлгэхээс аргагүй нөхцөл байдал бий болсон аж. Хил дээр гардаг хэргийн 70-80 хувь нь тэнд үйлдэгддэг. Арга ядаад Засгийн газар их хэмжээний хөрөнгө зарцуулж, отрядыг нүүлгэн шилжүүлэхтэй холбоотой ажлуудыг хийсэн байна. Одоо эмнэлэг барихад шаардлагатай хөрөнгийг төсөвт суулгаж буй аж.

Г.ДАРЬ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна