Украин чөлөөт худалдааны бүсийг нээнэ

2015 оны 11 сарын 18

Украин болон Европын холбооны чөлөөт худалдааны бүсийг ирэх 2016 оны нэгдүгээр сарын 1-нд нээхээр болсныг ерөнхийлөгч Пётр Порошенко мэдээллээ. Ийнхүү ОХУ-ын зүгээс эсэргүүцэж буй чөлөөт худалдааны гэрээ ирэх нэгдүгээр сараас хэрэгжих эхлэх гэж байна. Европын холбоонд нэгдэхийн эсрэг ОХУ Украинд олон талаар найр тавьсан боловч тусыг эс олжээ.

Украины экс ерөнхийлөгч Виктор Янукович 2013 онд Европын холбоонд нэгдэх болон чөлөөт худалдааны гэрээг хойшлуулснаас зөрчил үүсч, улс төрийн хямралын эхлэлийг тавьсан билээ. Киевт бослого гарч засаг солигдсоны дараа Крым болон Украины зүүн хязгаарт салан тусгаарлах үймээн дэгдсэн юм. Улмаар Крымын хойгийн Оросыг дэмжигчид өнгөрсөн оны гуравдугаар сард санал асуулга явуулснаар Украинаас салж, ОХУ-д нэгдсэн билээ. Түүнчлэн Киевийн шинэ засгийн газрыг эсэргүүцсэн Украины зүүн хязгаарын Оросын талыг баримтлагчид салан тусгаарлах тэмцэл өрнүүлж байна. Украины засгийн газрын хүчний мэдээлснээр Донецкийн хэд хэдэн тосгонд даваа гаригт /XI.17/ салан тусгаарлагчид их буугаар буудсан гэнэ. Украины зүүн хязгаарын зөрчил мөргөлдөөн Минск-2 гэрээний дагуу өнгөрсөн хоёрдугаар сараас хойш намжаад байгаа юм.

Б.АНХТУЯА

ЭХ СУРВАЛЖ: ВВС

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна