Г.Болдбаатар аваргын төлөө барилдана

2015 оны 11 сарын 26

БНСУ-ын Чэжү хотод жүдо бөхийн гранпри тэмцээн өнөөдөр эхэллээ. Энэ өдөр татамид зодоглож буй манай жүдочдоос гавьяат тамирчин Г.Болдбаатар финалд шалгараад байна.

Эрэгтэйчүүдийн 60 кг-ын жингийн С хэсгийг тэргүүлэн барилдаж буй гавьяат тамирчин Г.Болдбаатар Япон, БНСУ, Бразилын бөхчүүдийн ялж хагас шигшээд үлдсэн. Улмаар Азарбайжаны жүдоч Орхан Сафаровыг юүкогоор ялж, финалд шалгарлаа. Тэрбээр аваргын төлөө БНСУ-ын жүдоч Вон Жин Кимтэй барилдана.

Дэлхийн аварга Г.Болдбаатар.

Энэ өдөр барилдсан манай жүдочдоос эрэгтэйчүүдийн 60 кг-ын жинд ОУХМ Г.Хэрлэн хоёрдугаар тойргоос, 66 кг-д Д.Алтансүх гуравдугаар тойргоос тэмцээнийг өндөрлүүллээ. Мөн эмэгтэйчүүдийн 52 кг-ын жинд П.Буянхишиг, 57 кг-д Л.Энхрийлэн нар эхний тойрогт өрсөлдөгчөө дийлсэнгүй.

Эмэгтэйчүүдийн 52 кг-ын жинд барилдсан гавьяат тамирчин М.Бундмаа БНСУ, Испаний жүдочдыг ялсан ч хэсгийн аваргын төлөө Румыны Андрееа Читуд хожигдлоо. Манай бөх хүрэл медалийн төлөөх дагах барилдааныг Израилын Ронитой хийсэн ч торгуулиар ялагдаж, шагналт VII байрт шалгарлаа.

Энэ сарын 28-ны өдрийг хүртэл үргэлжлэх Чэжүгийн гранпри тэмцээнд дэлхийн 70 орны 421 жүдоч (эрэгтэй 237, эмэгтэй 184) оролцож байна. Манай улсаас эрэгтэй 9, эмэгтэй 7 жүдоч өрсөлдөж буй.

Тэмцээний эхний өдөр буюу өнөөдөр эрэгтэйчүүдийн 60, 66, эмэгтэйчүүдийн 48, 52, 57 кг-ын жингийн барилдаан болж, аваргууд тодорно.

Финалын барилдаан Улаанбаатарын цагаар 16.00-с эхэлнэ.

ШУУД ҮЗЭХ:

Ч.БОЛОР

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна