Туркийн хоригт орсон барааны урьдчилсан жагсаалтыг нийтлэв

2015 оны 11 сарын 30

Фото: Виктор Коротаев / «Коммерсантъ»

 

Оросын «Известия» сонин даваа гаригийн дугаартаа, ерөнхийлөгч Владимир Путины зарлигийн дагуу улс орондоо оруулахыг хориглосон бараа бүтээгдэхүүний урьдчилсан жагсаалтыг нийтэлсэн байна. Хөдөө  аж ахуйн яаманд  ойр эх сурвалжийн мэдээллээр уг жагсаалтыг гаргажээ.

 

Тухайлбал, хөргөсөн ба хөлдөөсөн бод малын  мах, махан бүтээгдэхүүн, гэрийн тэжээмэл шувууны махан бүтээгдэхүүн, давсалсан ба борцолсон мах, бүх төрлийн загас, далайн бүтээгдэхүүн, сүү, тараг, бяслаг, самар, жимс, ногоо зэргийг Засгийн газар нь хорионд багтаахаар төлөвлөөд байна.

 

“Россельхознадзор” гэх хяналтын байгууллага Туркийн бүтээгдэхүүнийг бүрэн орлуулах боломжтойг хэлж байна. “Нэгдүгээрт, барууны хориг арга хэмжээний улмаас бид өөрсдийн хөдөө аж ахуйн үйлдвэрлэлийг хурдан нэмэгдүүлэх боломжтой болсон байгаа. Мөн бид бүтээгдэхүүний нийлүүлэлтийг нэлээд хэмжээгээр тэлж чадлаа” гэж тэд мэдэгджээ.

 

Оросын засгийн газар  Туркийн эсрэг хоригт хамаарагдах бүтэгдэхүүний  жагсаалтыг даваа гаригт  нийтэлж  магадгүй гэж өмнө нь мэдээлж байсан юм. Оросын ерөнхийлөгч Владимир Путин арваннэгдүгээр сарын 28-нд Туркийн эсрэг эдийн засгийн тусгай арга хэмжээ авах тухай зарлигт гарын үсгээ зуржээ.  

 

Бэлтгэсэн Ш.МЯГМАР

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна