Калифорнийн буудлагыг террорын ажиллагаа гэж дүгнэв

2015 оны 12 сарын 5

 
 
 

Дэвид Боудич (төвд нь). Фото: Zhang Chaoqun / Xinhua / Zumapress / Global Look

 

АНУ-ын Холбооны мөрдөх товчоо, ХМТ Калифорнид хийгдсэн буудалцааныг алан хядах үйл ажиллагаа гэж ангилсан тухай Лос-Анжелес дэх товчооны орлогч захирал Дэвид Боудичийн хэлснээс ишлэн Reuters агентлаг дамжуулжээ.

 

“Бидэнд тодорхой болсон баримтад үндэслэн алан хядах ажиллагааны энэ аймшгийн хэргийг мөрдөж байна” хэмээн тэр хэлсэн байна.

 

Буудалцааныг хийсэн Ташфин Малик гэдэг эмэгтэй нь “Исламын улс” бүлгийн лидер Абу Бакр аль-Багдадид үнэнч гэж андгайлсан байжээ.

 

 

Малик өөрийн нөхөр Саид Ризван Фарукийн хамт хэрэг хийхээс өмнө аль-Багдадийг магтсан пост илгээсэн байсан тухай мэдээллийг нууц нэрээр гаргасан байна.

 

Тогтоогдсноор, 27 настай Малик пакистан гаралтай, Саудын Арабт амьдарч байгаад гэрлэлтийн визээр 2014 онд АНУ-д иржээ. Түүний нөхөр 28 настай Фарук, Чикаго хотод пакистан айлд төрөөд Калифорнид өсжээ. Сан-Бернардино хотод болсон буудалцаан 12 дугаар сарын 2-нд орон нутгийн цагаар 11:00 орчимд гарчээ. Гэмт хэрэгтнүүд нийгмийн халамжийн төвд нэвтрэн тэнд байсан хүмүүсийг буудсан байна. Энэ үеэр 14 хүн амиа алдаж, 21 хүн шархадсан юм.

 

Фарук, Малик хоёрыг цагдаагийнхан устгажээ.

 

Бэлтгэсэн Ш.МЯГМАР

 

 

 

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна