С.Батцэцэг дэлхийн хүчтэнүүдийг өнгөлсөөр

2015 оны 12 сарын 11

Дэлхийн бөхийн төрлүүдийн нэгдсэн холбооноос эрэгтэй, эмэгтэй бөхчүүдийн ээлжит чансаагаа зарлалаа. Энэ оны сүүлчийн чансааны шилдэг 20-д манай улсаас эрэгтэй долоо, эмэгтэй долоон тамирчин багтжээ. Эрэгтэйчүүдээс олон улсын хэмжээний мастер Б.Номин хамгийн өндөр чансаатай байна. Тэрбээр 61 кг-ын жинд хоёрдугаар эрэмбэлэгдсэн бол 74 кг-д дэлхийн аваргаас мөнгөн медаль хүртэж олимпийн эрхээ авсан П.Өнөрбат шилдэг гурвын нэг болов. Түүнчлэн саяхан болсон алтан гранприд аман хүзүүдсэн Э.Бэхбаяр тав, дэлхийн аваргад шагналт байр эзэлсэн Г.Мандахнаран, Ж.Чулуунбат нар зургадугаарт эрэмбэлэгджээ. Харин О.Үйтүмэн, Д.Хүдэрбулга нар шилдэг 20-ын тоонд багтлаа. Тэгвэл эмэгтэйчүүдээс дэлхийн хошой аварга, олимпийн хүрэл медальт С.Батцэцэг 63 кг-ын жинг дахин тэргүүллээ. Мөн 60 кг-д гавьяат тамирчин С.Цэрэнчимэд гурав, 69 кг-д О.Насанбурмаа шилдэг наймын нэгээр тодров. Харин Э.Нарангэрэл, Д.Отгонцэцэг, С.Бямбацэрэн, Б.Шоовдор нар хамгийн өндөр чансаатай 20 бөхийн нэг болсон байна. Дашрамд дурдхад, эрэгтэйчүүдийн 70, эмэгтэйчүүдийн 75 кг-ын жинд Монголын тамирчид энэ удаад дэлхийн чансаанд багтсангүй.

Б.ЗУЛ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна