Л.Энх-Амгалан Ёс зүйн хороонд хандаагүй байна

2015 оны 12 сарын 19

Хөгжлийн банк тойрсон асуудал одоо ч халуун сэдэв хэвээр байна. УИХ-ын гишүүн Л.Энх-Амгалангаар ахлуулсан ажлын хэсэг одоо хэр нь хуралдаж, дүгнэлтээ баталгаажуулаагүй байгаа. Гэвч ажлын хэсгийн ахлагч Авлигатай тэмцэх газраас ирүүлсэн мэдээлэлтэй холбогдуулж, Ёс зүйн хороонд хандан “Энержи ресурс”-ыг шалгуулаагүй гэх хэл аманд өртөөд буй аж. Учир нь УИХ-ын гишүүн Л.Энх-Амгалан хувьцаа эзэмшдэг компаниудаа Хөгжлийн банкны санхүүжилтээр дэмжсэн гэх мэдээлэл өнгөрсөн хавар цацагдаж, энэ асуудлыг шалгуулахаар өөрөө Авлигатай тэмцэх газарт хандсан юм. Тус газраас ирүүлсэн албан бичигт энэ асуудлыг УИХ-ын Ёс зүйн хороогоор хэлэлцэх ёстой гэсэн хариуг өгч байжээ.

Онцлоход, Хөгжлийн банкинд шалгалт хийсэн ажлын хэсэг энэ ондоо багтаан мэдээллээ УИХ-ын Эдийн засгийн байнгын хороо, УИХ-ын Төсвийн байнгын хороонд тайлагнах боломжгүй болж буй аж. Учир нь ажлын хэсгийн ахлагч, УИХ-ын гишүүн Л.Энх-Амгалан орон нутагт ажиллаж байгаад ирсэн ч ажлын хэсэг хуралдаж чадаагүй юм байна.

Мөн ажлын хэсэг өмнө гаргасан дүгнэлтээ баталгаажуулж чадах уу гэдэг ч анхаарал татах асуудал болж хувирч буй. УИХ-ын гишүүн Ч.Хүрэлбаатар нар энэ асуудлаар мэдээлэл хийхдээ шалгалт хийх явцад Хөгжлийн банкнаас 5.4 тэрбум төгрөг дутлаа хэмээн мэдэгдсэн. Харин Хөгжлийн банкны зүгээс ташаа мэдээлэл хэмээн үгүйсгэж, шүүхэд хандаад байгаа.

Д.БОРХҮҮ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна