Хэсгийн тоглолтууд явагдаж байна

2016 оны 1 сарын 12

-СТО-д явагдаж буй боксын УАШТ 14.00 цагаас эхлэх бөгөөд өнөөдөр эрэгтэй 52, 64, 69, 91 кг, эмэгтэй 51, 54, 57 кг-ын жингийн хэсгийн тулаанууд болно-

Монголын бүх ард түмний спортын XIV их наадмын хүрээнд зохиогдож буй XX зууны манлай дасгалжуулагч, гавьяат дасгалжуулагч В.Батбаярын нэрэмжит Боксын спортын Улсын аварга шалгаруулах тэмцээн өчигдөр(01.11) Спортын төв ордны “А” зааланд эхэллээ.

Энэ удаагийн тэмцээнд 34 байгууллагын эрэгтэй 141, эмэгтэй 81 нийт 224 гаруй боксчин эрэгтэй 10, эмэгтэй найман жинд өрсөлдөж байна. Эмэгтэйчүүдийн жинд ОХУ-ын Буриад, БНХАУ-ын Өвөрмонголоос тамирчид оролцож байна.

Олон улсын боксын холбооны дүрэмд заасны дагуу эрэгтэй гурван минутаар гурван үе, эмэгтэй хоёр минутаар дөрвөн үе тоглоно.

Өнөөдөр эрэгтэй 52 кг, 64 кг, 69 кг, 91 кг, эмэгтэй 51 кг, 54 кг, 57 кг-ын жингийн хэсгийн тулаанууд явагдана. Пүрэв, баасан гаригаас хагас шигшээ тоглолтууд эхэлнэ.

Тэмцээний гол онцлог нь 2016 оны олимпод оролцох эрхийн төлөө тулалдах тамирчдыг шалгаруулах юм. Энэ тэмцээнд түрүүлсэн тамирчид тухайн жиндээ олимпийн эрх авах олон улс, дэлхийн тэмцээнд оролцох эрхтэй болно. Хэрэв тэр тэмцээнүүдэд амжилт гаргавал эх орноо төлөөлөн олимпод оролцох эрхтэй болно гэсэн үг. Тиймээс боксын дугуйлантай бүхий л аймаг, спорт хороо, хувийн компани, байгууллага, клубууд тамирчдаа сойж байна. Оролцож буй тамирчдын тоо олон байгаа учраас тэмцээн уртасгасан цагаар ачаалалтай явагдах байх.

Тэмцээний сүүлийн өдөр буюу 1 дүгээр сарын 17-ны өдөр эрэгтэй, эмэгтэй бүх жингийн алтан медалийн тулаанууд болно.

Спортын төв ордонд бол буй боксын УАШТ өдөр бүрийн 14.00 цагаас эхэлнэ.

ХУВААРЬ:

I.11 (Даваа) - эрэгтэй 48, 56, 60 кг, эмэгтэй 48, 57, 64 кг

I.12 (Мягмар) - эрэгтэй 52, 64, 69, 91 кг, эмэгтэй 51, 54, 57 кг

I.13 (Лхагва) - эрэгтэй 49, 56, 60 кг, эмэгтэй 48, 60, 69 кг

I.14 (Пүрэв) - эрэгтэй 52, 60, 69, 75, 81, +91 кг, эмэгтэй 48, 57, 64 кг

I.15 (Баасан) - эрэгтэй 52, 56, 60, 64, 69, 81, эмэгтэй 54, 64, 75 кг (ХАГАС ШИГШЭЭ)

I.16 (Бямба) - эрэгтэй 49, 56, 64, 75, эмэгтэй 48, 51, 54, 57, 60, 69, 75 кг (ХАГАС ШИГШЭЭ)

I.16 (Ням) - эрэгтэй 49, 52, 56, 60, 64, 69, 75, 81, 91, +91, эмэгтэй 48, 51, 54, 57, 60, 64, 69, 75 кг (ФИНАЛ)

Ч.БОЛОР

Өчигдөр болсон нээлтийн фото агшнаас хүргэж байна.

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна