Дахин санал хураалт явуулахаар боллоо

2016 оны 1 сарын 18

Ардчилсан эмэгтэйчүүдийн холбооны дөрөвдүгээр чуулган Төрийн ордонд болж, холбооны тэргүүнийг сонгох санал хураалт явагдлаа. Ардчилсан эмэгтэйчүүдийн холбооны тэргүүнд 10 нэр дэвшигч өрсөлдөх эрхийн батламжаа гардан авсан талаар бид өмнө нь мэдээлсэн.  Гэвч өнөөдрийн чуулганаар зургаан нэр дэвшигч нэрээ татаж авснаар дөрвөн эмэгтэйн дунд ширүүн өрсөлдөөн өрнөлөө. Энэ холбооны тэргүүнээр хэн сонгогдох бол гэсэн таамаглал АН-ын хүрээнээс хальж сошиал ертөнцөөр ч  тараад байна.

Санал хураалт дөнгөж сая дуусаж  “Алтангадас” фракцын Б.Ургамалцэцэг, “Шонхор” фракцийн С.Одонтуяа нар ойролцоо санал авчээ. Тодруулбал, УИХ-ын гишүүн С.Одонтуяа 13 төлөөлөгчийн саналаар илүү байсан ч сонгуулийн дүн маргаан дагуулсан тул дахин сонгууль явуулахаар боллоо. Сошиал ертөнцөөр цацагдаж байгаа мэдээллээр бол дээрх дөрвөн нэр дэвшигчид, чуулганы эмэгтэйчүүдэд мөнгө тарааж санал худалдаж авсан гэх баттай бус мэдээлэл байна. Ямартай ч энэ холбооны тэргүүнээр сонгогдвол АН-аас УИХ-д суух жагсаалтын дээгүүрт бичигдэх ёстой. Тиймээс дахин санал хураалтаар Б.Ургамалцэцэг, С.Одонтуяа нарын аль нэг нь жагсаалтын эзэн болох нь.

Т.ДАВААНЯМ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна