Орос дахиад Туркийн хилийг зөрчсөн гэв

2016 оны 1 сарын 31

 

Оросын байлдааны онгоц Туркийн хилийг дахиад зөрчсөн гэж Анкара мэдээлэв. “Хэрэв ОХУ үргэлжлүүлэн хил зөрчсөөр байвал хариу арга хэмжээ авна” хэмээн Туркийн гадаад хэргийн сайд мэдэгджээ. Оросын СУ-34 байлдааны онгоц өнгөрсөн баасан гаригт /I.29/  орон нутгийн цагаар 11.46 цагт Сиритэй залгаа орших хилийг зөрчсөн гэж Туркийн албаныхан мэдээлж байна. Харин ОХУ-ын зүгээс үүнийг ор үндэсгүй худал суртал ухуулга хэмээн няцаажээ.

 

Өмнө нь өнгөрсөн арваннэгдүгээр сард Оросын СУ-24 байлдааны онгоцыг Туркийн арми сөнөөсөн нь хил зөрчсөнөөс болсон хэмээн Анкара мэдэгдсэн юм. Харин ОХУ-ын зүгээс Туркийн хилийг зөрчөөгүй байхад байлдааны онгоцыг нь отож сөнөөсөн гэж буруутгажээ. Энэ хэргээс үүдэн ОХУ болон Туркийн харилцаа муудаж, Москва Анкарагийн эсрэг эдийн засгийн хориг арга хэмжээ авсан билээ. Оросын хоригийн улмаас Турк 10 тэрбум ам.долларын хохирол амсах урьдчилан тооцоо гарсан. Түүнчлэн ОХУ Туркийг Исламын улс бүлэглэлээс нефть худалдан авч, террористуудыг санхүүжүүлдэг хэмээн буруутгажээ.

 

ОХУ нь өнгөрсөн есдүгээр сараас хойш Сирийн хойд хэсэгт “Исламын улс” бүлэглэлийн эсрэг агаараас цохилт өгч байгаа билээ.

 

Б.АНХТУЯА

ЭХ СУРВАЛЖ: ВВС

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна