Шинийн 2-ноос хүйтний эрч чангарна

2016 оны 2 сарын 8

Малчид, тээвэрчид, ард иргэдийн анхааралд:

Шинийн 2-нд баруун зүгийн нутаг, төвийн нутгийн баруун хэсгээр, шинийн 3-нд ихэнх нутгаар цас орж, цасан шуурга шуурч хүйтэрхийг онцгойлон анхааруулж байна.

Цагаан сарын өдрүүдэд нутгийн нийт хэсгээр цас орж, шуурахыг Цаг уур орчны шинжилгээний хүрээлэнгээс анхаарууллаа. Өнгөрсөн амралтын өдрүүдэд хүйтний эрч суларсан боловч маргаашнаас буюу шинийн нэгнээс шинийн гурван хүртэл шуурга шуурч, хүйтрэх төлөвтэй байна. Тодруулбал, энэ сарын 9-нд баруун аймгуудын нутгаар, төвийн аймгуудын хойд хэсгээр, 10-нд баруун, төвийн ихэнх нутгаар, 11-нд нутгийн зүүн хэсгээр цас орж, хүйтрэх юм. Ялангуяа хоёрдугаар сарын 09,10 ний өдрүүдэд бүх нутгаар салхи салхилж, нутгийн төв, зүүн хэсгээр салхины хурд 9-14 метрт хүрч, нутгийн хойд хэсгээр 18-20 метр хүртэл сэрүүсэж, цасан шуурга шуурна.

Улаанбаатар хотын тухайд сар шинийн нэгний өдөр дулаахан, иргэд өмссөн хувцсандаа түүртэж, халууцах хандлагатай байна. Гэвч маргааш нь буюу шинийн хоёронд цас орж шуурна. Оройдоо хүйтний эрч чангарах юм. Нийт нутгийн 80 гаруй хувь нь цастай, Увс нуур, Дархадын хотгор, Завхан голын эх зэрэг томоохон гол нууруудын сав газар шөнөдөө -40 градус, өдөртөө -30 аас дээш хэмийн хүйтэн байгаа. Дээрх нутгаар салхи сайн салхилбал хонхор газарт бүрэлдсэн хүйтний эрч салхинд туугдаж, хүйтний хэм суларна гэж Цаг уур орчны шинжилгээний хүрээлэнгээс мэдээллээ. Баярын өдрүүдэд ихэнх нутгаар цас орж, шуурна гэдгийг дахин анхааруулъя. Иймд дээрх өдрүүдэд орон нутгаас хотыг, Улаанбаатараас хөдөөг зорьж золголт хийх иргэд дулаан хувцаслах, жолооч нар тээврийн хэрэгслийн техникийн бэлэн байдлыг хангуулах, шатах тослох материалын нөөцтэй замд гарах, замын нөхцөлд тохирох хурдыг сонгох, аюулгүй байдлыг хангаж хөдөлгөөнд оролцохыг сануулж байна.

Д.УЛАМБАЯР

Зураглаач Н.БАТМӨНХ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна