“Жинхэнэ нөхөр”

2016 оны 2 сарын 15

Гэр хорооллын иргэдийг хямд нүүрсээр хангахын тулд “Нүүрс” хөтөлбөрийг хэрэгжүүлэх  явцдаа албан тушаалаа урвуулан ашиглаж, улсад 3.6 тэрбум төгрөгийн хохирол учруулсан хэргээр шүүгдсэн Ерөнхий сайд асан Н.Алтанхуягийн ахлах зөвлөх асан Л.Гансүх нарын хэргийн давж заалдах шатны хурлаар Л.Гансүхэд анхан шатны шүүхээс өгсөн 4.6 жилийн ялыг хэвээр үлдээсэн билээ. Л.Гансүх, Н.Даваахүү, Б.Мөнгөнтуяа нарын гурван иргэнд нийт 2 тэрбум 539 сая 730 мянга 860 төгрөгийг хувь тэнцүүлэн гаргуулах шийдвэрийг ч хэвээр үлдээсэн юм.

Харин Л.Гансүхийн хувьд албан тушаалаа урвуулан ашиглаж завшсан мөнгө байхгүй. Би тийм шийдвэр гаргах эрх бүхий албан тушаалтан ч биш гэж шүүх хурлын үеэр мэдэгдэж  байсан юм.

Зовох цагт нөхрийн шинж танигдана гэгчээр Л.Гансүхийн шүүх хуралд өөрийн биеэр оролцож мэдүүлэг өгч байсан Ерөнхий сайд асан Н.Алтанхуяг өнгөрсөн амралтын өдрүүдэд олон нийтийн сүлжээнд нэгэн шуугиан тарилаа. Тэрээр өөрийн албан ёсны цахим хуудастаа Л.Гансүхийг эргээд ирсэн тухайгаа “Гансүхтэйгээ очиж золголоо. Та бүхэнд сар шинийн мэнд дэвшүүлсэн шүү” хэмээн бичиж, түүнтэй хамт авхуулсан зургаа тавьсан нь сошиал ертөнцийн талархлыг хүлээгээд байна.

Монголчуудын ууч зан хөдөлж, Н.Алтанхуягийг “жинхэнэ нөхөр”, “жинхэнэ мужик” гэх зэргээр магтаж байна. Тэрээр найздаа очиж золгохдоо гоё, ганган хувцаслалгүй энгийн хувцастай очсон нь олон нийтийн талархлыг хүлээгээд буй юм. Ямартай ч ял авсан найзаасаа зайгаа барилгүй эргэж очсон нь түүнийг ийнхүү магтахад хүргэж, зарим улстөрчдийг суралцахыг зөвлөхөд хүргэлээ.   

Л.ХАЛИУ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна