IX Богдын лагшин эрдэнийг Ганданд заллаа

2016 оны 2 сарын 15

Шинийн наймны билигт сайн өдөр Гандантэгчэнлин хийд сүсэгтнүүдийн хөлд дарагджээ. Бичин жилийнхээ засал номыг хийлгэх ард иргэдээс гадна дээрхийн гэгээнтэн IX Богд Жэвзүндамба хутагтын Лагшин эрдэнийг залах ёслолд оролцох сүсэгтэн олон хийдийг зорин ирсэн байна.

Дээрхийн гэгээнтэн IX Богд Жэвзүндамба хутагтыг XVII жарны усан луу жилийн хаврын тэргүүн сарын шинийн 8-нд мөнх бусын дүрийг үзүүлсэн гэж үздэг. Энэ нь орчин цагийн тооллоор 2012 оны гуравдугаар сарын 1-ний луу цагт юм байна. Өнгөрсөн хугацаанд Богд гэгээнтний шавь нар багшийнхаа лагшин шүтээнийг дээдэс лам нарын адил уламжлал ёсоор бурханчлан бүтээж шүтээн болгон залжээ. Энэхүү шүтээнийг өнөөдөр 13.00 цагт Гандантэгчэнлин хийдийн Гандан дуганд залж, равнай мандал өргөлөө.

I богдоос эхлээд VIII богд хүртэлх үе үеийн богдыг ийнхүү залж, монголчууд сөгдөн мөргөж, шүтэж, адис хүртэж ирсэн уламжлалтай. Энэ үеэр Гандантэгчэнлин болоод бусад хийдийн хамба лам нар хүрэлцэн ирсэн байлаа. Ёсолгооны эхэнд Гандантэгчэнлин хийдийн тэргүүн хамба лам Д.Чойжамц үг хэлсэн юм. Тэрбээр “Өнөөдрийн ёслогоо бэлгэ дэмбэрэл төгс болж байна. Богд минь ирээд залрахаар нэг их сайхан болдог. 1999 онд Богд залрахад хийдийн хамба нар цугларч, хөөрөг зөрүүлэн мэндчилэн уулзаж байлаа. 2009 онд залрахад мөн ийнхүү уулзаж байсан санагдана. Өнөөдөр мөн бүгдээрээ ийнхүү цугларч байна. Ийм сайхан шашны эв нэгдэл болж, нэг зорилготой болдог бэлгэ дэмбэрэлтэй өдөр байдаг. Энэ олон сүсэгтнүүд Гандан хийдийн маань хашаанд багтахгүй багшралдаж байна. Ингээд харахаар Монголын бурхан шашны ирээдүй тунамал байна. Бурхны шашинд хоёр үүрэг бий. Нэгдүгээрт, сүсэгтнүүдийн эрэлт,  горилыг хангаж явах. Хоёрдугаарт соён гэгээрүүлэх үүрэг байдаг. Ийм сайхан үйлийг бид цаашид ч хийсээр байх болно. Үүний төлөө зүтгэнэ” хэмээн хэллээ.

Мөн энэ үеэр шүтээнийг бүтээхэд гар бие оролцсон бурханч лам Г.Пүрэвбат “Өнөөдөр монгол оронд шашин дахин сэргэж, IX богдынхоо лагшин дүрийг шүтээн болгон залж, мөргөх боломж олдож байгаа нь үнэхээр олзуурхууштай зүйл болж байна. Гурван жил занданшуулах ажлыг хийж гүйцээснийх нь дараа лагшин дүрийг нь шүтээнчлэн залах ажлыг Гандан лаврангаас итгэл найдвар хүлээлгэсний дагуу бид хичээн хагас жил орчим ажиллалаа. Богдын маань сэнтийг бүтээх ажлыг Дүйнхор дацангийн лам Сэсэндэмид удирдан ажилласан. Мөн Богдын маань дээл хувцас, олбогоос эхлээд бүх нарийн нандин зүйлсийг хийхэд Гандан лавран болон Номын гэрээс н.Амгалан, н.Алтангэрэл тэргүүтэй лам нар гардан хийж гүйцэтгэсэн. Ийнхүү ард иргэд, сүсэгтэн олонд Богддоо мөргөж, залбирах боломж олгосон шүтээнийг хийхэд гар бие оролцсон лам нартаа бүгдэд нь баярласан талархсанаа илэрхийлмээр байна” гэлээ.

Б.ЗАЯА

ЗУРАГЛААЧ: Н.БАТМӨНХ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна