Зика вирус бэлгийн замаар дамжсан 14 тохиолдол бүртгэгджээ

2016 оны 2 сарын 24

 

АНУ-д Зика вирусын халдвар бэлгийн замаар дамжсан 14 шинэ тохиолдол бүргэгджээ. Эдгээрийн дунд жирэмсэн эмэгтэйд бэлгийн замаар халдвар дамжсан тохиолдол байгаа аж. Зика вирус бэлгийн замаар халдсан тохиолдол анх АНУ-ын Техас муж улсад бүртгэгдсэний дараа халдвар гарсан орнуудад аялаад ирсэн хүмүүсийг бэлгэвч хэрэглэхийг уриалж байсан юм.  Зика вирус халдвартай хүний үрийн шингэнээр эрүүл хүнд халдсан тохиолдлыг эрдэмтэд судалж байгаа аж. АНУ-ын ерөнхийлөгч Барак Обама Зика вирусын халдварын эсрэг тэмцэлд 1.8 тэрбум ам.долларыг төсөвлөх саналыг гаргажээ.

 

Түүнчлэн Бразилийн эрдэмтэд Зика вирус жижиг тархитай хүүхэд төрөх эмгэгт хэрхэн нөлөөлж байгааг нарийн судалж эхэлсэн байна. Эрдэмтэд халдвар илэрсэн хоёр жирэмсэн эмэгтэйн ургийн уснаас Зика вирусыг илрүүлсэн аж. Жижиг тархитай төрсөн хүүхдүүд оюун ухааны хомсдолтой, хараа, сонсгол муутай байдгаас насан туршийн асаргаанд байх болдог юм.

 

Зика вирусын халдвар шумуулын хатгалтаар дамжин тархдаг нь батлагдсан бол бэлгийн замаар дамжсан тохиолдол бүртгэгдэж эхлээд байна. Зика виурсын халдвар өнгөрсөн аравдугаар сард Бразилд бүртгэгдсэнээс хойш Латин Америк, Карибын 20 гаруй оронд 1.5 сая хүнд халджээ. Түүнчлэн Колумб улсад 4000 гаруй жирэмсэн эмэгтэйд Зика вирусын халдвар илэрсэн байна. Харин Мексикт халдвартай эхээс эрүүл хүүхэд төрсөн тохиолдол бүртгэгдсэн юм.

 

Б.АНХТУЯА

ЭХ СУРВАЛЖ: ВВС

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна