“Буянт-Ухаа-2” орон сууцны хороололд байр авсан иргэд хөл дүүжлэх унаагүйгээс зутруухан байгаа аж. Дээрх чиглэлд нийслэлийн Тээврийн газраас нэг ч автобус үйлчилгээнд гаргаагүй байгаа юм байна. Иймээс тус хороололд амьдардаг иргэд хотын төв рүү ажилдаа ирэх, мөн гэртээ харих бол Улаанбаатар хот-Төв аймгийн хооронд нийтийн тээвэрт явж байгаа автобус, микробус, эсвэл Өлзийт хороолол руу үйлчилгээнд явдаг автобусанд дайгддаг аж.

Өлзийт хороолол руу үйлчилгээнд явдаг автобус нь 1 цагийн зайтай явдаг бол Төв аймаг руу хот, хоорондын тээвэрт явж байгаа автобус, микробус нь өдөрт гурав л явдаг байна. Тиймээс тус хорооллын оршин суугчид Нийслэлийн Тээврийн газрыг энэ асуудалд анхаарлаа хандуулж, хөл дүүжлэх унаатай болгохыг хүсч байгаа юм.

Онцлоход, “Буянт-Ухаа-2” орон сууцны хорооллын эхний ээлж өнгөрсөн оны арванхоёрдугаар сард ашиглалтад орсон юм.

Уг хорооллыг Орон сууц санхүүжилтийн корпорацийн захиалгаар Үндэсний бүтээн байгуулалт корпраци барьсан юм.

Г.ХОРОЛ