Малайзын онгоцны үлдэгдэл мөн гэв

2016 оны 3 сарын 24

Австралийн тээврийн сайдын хэлснээр Мозамбик, Өмнөд Африкаас олдсон хэсгүүд алга болсон онгоцны үлдэгдэл  мөн гэнэ.

 

Шинжилгээнд явуулсан хоёр хэсгийн нэгийг нь Өмнөд Африкаас нэгэн жуулчин олсон бол нөгөөг нь Мозамбикаас олсон юм.

 

 

Онгоцны хэсгүүд өөр өөр газраас олдсон нь онгоц далайд осолдож, эвдэрч сүйрсэн хэсгүүд нь далайн давалгаанд түрэгдэн өөр өөр газарт хүрсэн гэдэг таамаглалыг шинжээчид дэвшүүлж байгаа юм. 239 зорчигчтой онгоц 2014 оны гуравдугаар сард сураггүй болсон билээ.

 

Малайзын Куала Лумпураас Бээжинг чиглэн нисч явсан онгоц чиглэлээ өөрчилснөөс хойш сураг тасарсан бөгөөд Энэтхэгийн далайд осолдсон байж болзошгүй гэдэг таамаг дэвшүүлсэн юм.

 

Онгоцонд юу тохиолдож, зорчигчид, нисэх багийнхан хэрхсэн нь нууцлаг оньсого болж үлдсэн билээ.

 

Онгоцноос нэг ч хэлтэрхий олдоогүй байгаа бөгөөд Өмнөд Африк, Мозамбикаас олдсон хэсгийг алга болсон онгоцны хэсэг байж магадгүй гэж таамаглаж байгаа юм.

 

Австралийн шинжээчид онгоцны үлдэгдлийг шинжлээд агаарын тээврийн Боинг 777 онгоцны загвартай таарч байгааг тогтоосон юм.

 

Шинжээчид эцэст нь хоёр хэсэг хоёулаа алга болсон MH370 онгоцны үлдэгдэл мөн гэсэн дүгнэлтэд хүрсэн байна.

 

Эрлийн ажиллагааг дахин үргэлжлүүлэхээр болсон бөгөөд Энэтхэгийн далайд 25,000 км – ийн радиуст самналт хийх гэнэ.

 

Н.ЭНХ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна