“АН-ыг хагарсан гэж ойлгохгүй байна” гэв

2016 оны 4 сарын 8

АН-ын Ерөнхий нарийн бичгийн даргыг түр орлон гүйцэтгэгч Л.Эрхэмбаяраас зарим асуудлыг тодрууллаа.


-АН-ын гишүүдтэй холбоотой зарим мэдэгдэл, үйл явц нь танай намыг хагаралтай байна гэж харагдуулж байна. Үүнд хариулт өгөхгүй юу?    

-Би АН-ыг хагаралдаж байна гэж ойлгохгүй байгаа. Энэ нь магадгүй үнэмшилгүй сонсогдох байх. Тодорхой асуудлаар АН-ын гишүүд өөрсдийн байр суурийг хамгаалж байна. Тэр тухай асуудлаар гишүүдийг шүүмжлэх юм уу, эсвэл Ерөнхийлөгчийг шүүмжлэх нь хувь хүний үүднээс гаргаж байгаа үйлдэл гэж харж байна.  

-АН-ын ҮЗХ дөрөвдүгээр сарын 16-нд хуралдана. Энэ хурлаар АН үзэл бодлоо нэгтгэж чадах болов уу?

-Энэ хурлаар хамгийн түрүүнд 2016 оны сонгуулийн мөрийн хөтөлбөрийг батална. Дөрөвдүгээр сарын 20-нд Үндэсний аудитын газарт сонгуулийн мөрийн хөтөлбөрөө өгөх ёстой. Тиймээс ҮЗХ-оор шийдэх шийдэх нэн тэргүүний асуудал бол намын мөрийн хөтөлбөр юм.

-ИЗНН, МҮАН-д нэгдэх санал тавьсан. Энэ асуудал юу болж байна вэ? ИЗНН-д бусад намаас эвсэх санал ирээд байгаа сурагтай байна?

-Улс төрийн хоёр намд  манай намтай нэгдээч гэсэн санал хүргүүлсэн. Энэ асуудлыг ҮЗХ-ны хурал дээр ярилцах байх.     

-МҮАН одоогоор ямар байр суурь илэрхийлж байгаа вэ?

-МҮАН-ын дарга М.Энхсайхан бол нийлэхгүй эвсэж болно гэж хэвлэлээр хэлсэн байна лээ. Тэр бол байж болох ердийн хэм хэмжээ шүү дээ. 

-Яг өнөөдрийн тухайд бол хоёр намын нэгдэх болон эвсэх асуудал хууль эрх зүйн хувьд боломжтой юу?

-Болно. Өөрийнхөө намыг татан буулгаад манай намд орчихно гэсэн үг шүү дээ. Манай нам бусад улс төрийн намтай эвсэхгүй. Дангаараа сонгуульд орно.

Т.ДАВААНЯМ

 

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна