Өмнөговь аймгийн Булган суманд өнгөрсөн долоо хоногт оюутан залуучуудын анхдугаар чуулга уулзалтыг зохион байгууллаа. Чуулга уулзалтын үеэр зохион байгуулсан тэмцээнд зургаан баг оролцсоноос н.Ядам ахлагчтай “Булган гол” баг тэргүүн байр эзэлж, шилжин явах цом, өргөмжлөл, мөнгөн шагнал, алтан медалиар шагнуулжээ. Мөн энэ үеэр сурлага, урлаг, спортын амжилтаар бусдыгаа манлайлсан оюутан н.Азжаргалыг МАСОХ-ны дээд шагнал “Эрдмийн од” алтан медалиар шагналаа. Булганы залуучууд чуулганыхаа үеэр “Бүтээлч ажил”-ын аяныг эхлүүлж ерөнхий боловсролын сургуулийн гадаа талбайг тохижуулан залуучуудын нэрэмжит талбай байгуулах ажилд гар бие оролцлоо. Тус талбайд элсний волейбол, хөл бөмбөг, сагсны талбай, сүүдрэвчтэй болгожээ.