БНХАУ-ын өмнөд бүсийн Гуандун мужийн Гуанжоу хотноо Азийн XVI спортын наадам амжилт болж өндөрлөсний дараа буюу хаалтын ажиллагаанаас хойш хоёр долоо хоногийн Паралимпийн Азийн X наадам өнөөдөр орой хөшгөө нээх гэж байна. Энэ сарын 12-19-ний өдрүүдэд “Цэцгэн хот”-ноо болох Азийн пара наадамд Шар тивийн 41 орны 2405 тамирчин спортын 19 төрөлд өрсөлдөх юм. Харин манай улсаас тус наадамд жүдо, хөнгөн атлетик, буудлага, байт харваа, волейбол, хүндийг өргөлт гэсэн спортын зургаан төрөлд 37 тамирчин хурд хүч, авхаалж самбаагаа сорин өрсөлдөнө. Сануулахад, “Бээжин-2008” паралимпийн аварга, Монгол Улсын Хөдөлмөрийн баатар Д.Баатаржаваар ахлуулсан Монголын паралимпийн тамирчид энэ сарын 9-нд Гуанжоуг зорьсон юм.