Олон улсын биржүүд дээр хүнсний бүтээгдэхүүний үнэ өсч байгаагийн шалтгааныг шинжээчид хэд хэдэн хүчин зүйлтэй холбон тайлбарлажээ. Үүнд, юун түрүүнд, газрын тосны үнийн өсөлт нөлөөлсөн. Мөн Хятад, Энэтхэг тэргүүтэй орны хүн ам өсч байгаагаас эрэлт нэмэгдэх болсон билээ. Оросын тариаланчид бага ургац авч, АНУ-д Флорида, Техас мужуудын ургац сүйдэж, Энэтхэг, Пакистан, Австралид үер болсныг мартаж болохгүй. Иймэрхүү байдал цаашид үргэлжилбэл хүнсний хомсдол үүсч магадгүй гэх болгоомжлол хэдийнэ бий болчихоод байгаа. Үүнээс болж бордооны үнэ өссөн нь фермерүүдэд бас нэгэн дарамт болжээ. Ричмондын “Ellwood Thompson’s Local Market”-ын шинжээч Томми Лэнгфорд “Хүнсний бүтээгдэхүүний үнийн өсөлтөд маш олон хүчин зүйл нөлөөлж байна. Тэр дундаа цаг уурын өөрчлөлт тодорхой нөлөө гэхээс илүү шатахууны үнэ өссөн нь хамгийн том хүчин зүйл юм” гэжээ.
Хятад, Энэтхэгт барууны амьдралын хэв маягийг дууриасан дундаж давхаргынхны тоо нэмэгдэж байгаа. Энэ нь тэдний хэрэглээ бас өснө гэсэн үг юм. Дэлхийн банкнаас өнгөрсөн сард нэгэн анхааруулга гаргасан билээ. Олон улсын хэмжээнд хүнсний бүтээгдэхүүний үнийн индекс өнгөрсөн оны аравдугаар сараас энэ оны нэгдүгээр сар хүртэлх хугацаанд 15 хувиар өссөн байна. Тиймээс Дэлхийн банкны шинжээчдийн үзэж байгаагаар энэ онд 44 сая хүн өлсгөлөнд нэрвэгдэх аюултай тулгарчээ. Хүнсний бүтээгдэхүүний үнийн өсөлт АНУ тэргүүтэй хөгжингүй орнуудын хэрэглэгчдэд харьцангуй бага нөлөөлөх юм. Зөвхөн америкчууд л гэхэд орлогынхоо 15 хувийг хүнсэндээ зарцуулна гэх тооцоо бий. Харин хөгжиж буй орнуудын иргэдийн хувьд орлогынхоо 50 хувийг хүнсэнд зарцуулж байна.
НҮБ-аас саяхан гаргасан мэдээлэлд өнгөрсөн сард хүнсний бүтээгдэхүүний үнийн индекс сүүлийн найман сард анх удаа буурсан тухай онцолжээ. Гэхдээ энэ бол түр зуурын үзэгдэл хэмээн шинжээчид тайлбарласан байна. Ойрхи Дорнод, хойд Африкийн орнуудад болж буй улс төрийн үймээн самуунтай зэрэгцээд Японы Засгийн газар сэргээн босголтын ажлаа эхлэх гэж байгаатай зэрэгцээд олон улсын биржүүд дээр түүхий эдийн эрэлт өсөх хандлагатай болсон. Энэ нь хүнсний бүтээгдэхүүний зах зээлд нөлөөлж, хэтдээ үнийг нь нэмнэ гэх хүлээлт байгаа юм. “Bloomberg”-ийн шинжээчдийн тооцож байгаагаар 2050 он гэхэд хүнсний бүтээгдэхүүний үйлдвэрлэл 70 хувиар өсч, дэлхийн хүн амын тоо 10 тэрбумд хүрэх аж. Түүнчлэн эрдэнэ шишийн үнэ өнгөрсөн онд хоёр дахин нэмэгдсэн бол улаан буудайн үнэ 69 хувиар өссөн гэх мэдээ бий. Мөн энэ онд Хятадад ган болж магадгүй гэх таамаг байгаа. Энэ нь Хятад улс бага ургац авна гэсэн үг юм.
Их Британи, Бразилийн Засгийн газар Их 20-ийн орнуудыг үнийн өсөлтийг тогтвортой байлгахын тулд дорвитой алхам хийхгүй байна хэмээн шүүмжилжээ. Бразилийн хувьд дэлхийн нийт ургацын 19 хувийг бүрдүүлдэг билээ. Ямартай ч Их 20-ийн орнуудын Хөдөө аж ахуйн сайд нар ирэх зургадугаар сард хуралдаж, хүнсний бүтээгдэхүүний үнийн өсөлтийн талаар хэлэлцэх юм.
Зохиогчийн эрх:
"Улс төрийн тойм" сонин