Хуулийн зохицуулалт талаас нь авч үзье. Эрүүгийн хуульд торгох ял, гэмт хэргийн ангилал, хулгайн хэрэгт эрүүгийн хэрэг үүсгэх хохирлын хэмжээ зэрэг нь хөдөлмөрийн хөлсний доод хэмжээнээс шууд хамааралтай. Эрүүгийн хуульд ийм заалт оруулсан нь хулгайч нарыг өөгшүүлж, хулгайн гэмт хэрэг өсөх шалтгаан болсоор байна. Өөрөөр хэлбэл 140.400 төгрөгөөс доош үнэ бүхий эд зүйл хулгайлсан бол эрүүгийн хэрэг үүсгэхгүй, захиргааны арга хэмжээ аваад өнгөрнө. Тэгэхээр малын, халаасны, орон байрны хулгайч нарт эд зүйлээ алдсан иргэд хохироод үлдэж байгаа юм. Нөгөө талаас торгох ялын хэрэгжилт тун тааруу байдаг аж. Гэмт хэрэг үйлдэгсэд гурван жилийн хугацаанд иргэнд үзүүлсэн хохирлоо төлөх торгох ялаар шийтгүүлдэг ч хохирлыг нь барагдуулсан тохиолдол ховор. Торгох ял нэрийдлээр гэмт хэрэгтнүүдэд ял завших бас нэг боломжийг хөдөлмөрийн хөлсний доод хэмжээ гэгч олгож буй. Түүнчлэн гэмт хэргийн ангилал хөдөлмөрийн хөлсний доод хэмжээнээс хамааралтай байгаа нь хулгайчдад завшаан болсоор.
Улсын хэмжээнд өнгөрсөн онд 5777 хулгайн хэрэг бүртгэгдсэн нь өмнөх оноос 9.4 хувиар өсчээ. Үүнээс хувийн өмч хулгайлах хэрэг өндөр хувийг эзэлж байв. Энэ оны эхний гурван сарын байдлаар хулгайн гэмт хэрэг 1418 бүртгэгдсэн нь өмнөх өны мөн үеийнхээс 10.1 хувиар, хувийн өмч хулгайлах хэрэг 34.6 хувиар, малын хулгайн хэрэг 99.9 хувиар, тээврийн хэрэгслийн хулгай 42.1 хувиар, халаасны хулгай хоёр дахин өсчээ. Энэ бол зөвхөн цагдаагийн байгууллагад бүртгэгдсэн хэргийн тоо. Үүний цаана цагдаагийн байгууллагад хандаагүй урт хумстнуудад эд зүйлээ алдсан иргэд захаас аваад бий. Цагдаагийн байгууллагад хандлаа гээд хүлээлгэх хариуцлага нь өчүүхэн бага учир тэгэсгээд орхидог нь үнэн. Дээрх олон мянган хулгайн хэрэг үйлдэгсдийн хэдэд нь эрүүгийн хариуцлага хүлээлгэдэг вэ.
Улсын дээд шүүхэд бүртгэгдсэн тоогоор 2009 онд 1349 , 2010 онд 1235 хулгайн хэргийг эцэслэн шийдсэн байна. Тэгэхээр жилд бүртгэгдэж буй 5000 гаруй хулгайн хэргийн дөнгөж 1000 гаруйг нь шүүхээр шийдсэн гэсэн үг. Үлдсэн 4000 нь 20 мянган төгрөгөөр торгуулаад, дахин хулгайгаа хийж яваа. Эрүүгийн хуульд хулгайн хэргийг давтан үйлдсэн, бүлэглэн үйлдсэн бол хорих ялаар шийтгэнэ. Хулгайн хэрэг өсч байхад хулгайн хэргээр ял шийтгүүлэгчдийн тоо буурсан үзүүлэлт ч харагдаж байв. Тухайлбал 2009 онд 2195 хүн шүүхээр ял шийтгүүлсэн бол өнгөрсөн онд 1903 болж 13.3 хувиар буурчээ. Хулгайн гэмт хэргийн гаралт жилээс жилд өсч байхад шүүхээр шийтгүүлэгсдийн тоо буурч байгаа нь Эрүүгийн хуулийн дээрх зохицуулалттай холбоотой. Тиймээс хулгайн хэрэг үйлдсэн этгээдийг хөдөлмөрийн хөлсний доод хэмжээнээс хамаарахгүй эрүүгийн хариуцлага хүлээлгэдэг болмоор байна.
Дэлхийн бусад улсуудад иргэдийн хувийн өмчийг төр дээд зэргээр хамгаалдаг, гэмт хэрэг үйлдсэн этгээдийн орлогод дүйцүүлэн торгох ял оноодог тогтолцоо бий. Энэ тогтолцоо руу ойрын хугацаанд орж чадахгүй юмаа гэхэд бусдын эд зүйлийг шунахайн сэдэлтээр хулгайлсан этгээдэд хүлээлгэх хариуцлагыг чангатгая. Бүтэн сар хүлээсэн өвөө, эмээгийн тэтгэвэр, ээж ааваасаа аминчлан гуйж авахуулсан бяцхан хүүгийн гар утас юу ч биш юм уу…