Ахмад тоглогч Дирк Новицкигээр ахлуулсан “Даллас Маверикс” NBA-ын аварга боллоо. Өнөөдөр нарлаг Майамид болсон аваргын төлөөх цувралын зургаа дахь тоглолтод Жейсон Терри 27 оноогоор багаа тэргүүлж, Новицки 21 оноо авснаар “Маверикс” үндсэн цагт 105:95 харьцаатай ялалт байгуулж, 1980 оноос түүхээ бичиж эхэлсэн тус баг 31 жилийн түүхэндээ анх удаа NBA-ын аваргын цом хүртэх эрхтэй боллоо. Мөн л Майамид болсон цувралын эхний тоглолтод хожигдсон ч сүүлийн таван тоглолтын дөрөвт нь илүүрхсэн Далласын баг ийнхүү орчин цагийн шинэ их гурвалын хүсэл мөрөөдлийг үгүй хийж, аваргын бөгж гартаа гялалзуулахаар болж байна.
“Майами Хит”-ээс “Хаан” Жеймс 21 оноогоор багаа манлайлсан бол Крис Бош 19, Марио Чалмерс 18, Двейн Уейд 17 оноо авсан ч өрсөлдөгчөө буулган авч чадсангүй. Тоглолт өндөрлөсний дараа “Маверикс”-ийн эзэн Марк Кубан талбайд гүйн гарч ирээд дасгалжуулагч Рикийг тэврэн авч, баяр хүргэж буй нь харагдав. Харин NBA-ын супер оддын нэг Леброн Жеймс хэдийнэ есөн улирлыг NBA-д үдсэн ч анхны аваргын цомоо наанадаж дахин нэг жил хүлээх хэрэгтэй боллоо.
NBA-ын түүхэн дэх шинэ аваргуудад, тэдний үнэнч фенүүдэд баяр хүргэе.