Монгол Улсын Үндэсний аюулгүй байдлын зөвлөлийн Ажлын албаны дарга Б.Хурцад холбогдох шүүх хурлын эцсийн хуралдааны дүнд түүнийг Германы талд хүлээлгэн өгөөд байгаа. Энэ хэргийн талаарх мэдээлэл хэвлэлийн хуудаснаа тасралтгүй үргэлжилж, хамгийн сүүлийн мэдээллээр, “Өдрийн шуудан” сонинд бичсэнчлэн Д.Энхбат агсны дүү Д.Баяраа Б.Хурцын эсрэг мэдүүлэг өгөхөөр Герман улсыг зорьсон бололтой. Энэ талаар шинэ мэдээлэл хайж байх үед нэгэн сонирхолтой баримт олдсон юм. Юу гэвэл энэ оны нэгдүгээр сарын 26-нд Нийслэлийн прокурорын газраас Хүний эрхийн үндэсний комиссын гишүүн П.Оюунчимэгт зарим мэдээллийг шалгасан тухайгаа албан бичгээр мэдээлсэн байна.
Үүнд “Д.Энхбатын дүү Д.Баяраа 10 хоног ярих чадваргүй болжээ” гэсэн гарчигтай ярилцлага “Өнөөдөр” сонины 2010 оны арваннэгдүгээр сарын 8-ны дугаарт гарсан. Үүний мөрөөр мэдээллийг шалгуулахаар Нийслэлийн прокурорын газраас өгсөн үүргийн дагуу Улсын мөрдөн байцаах газрын Онц хүнд, зохион байгуулалттай гэмт хэрэг мөрдөх тасгийн ахлах мөрдөн байцаагч шалгаад эрүүгийн хэрэг үүсгэхээс татгалзах санал гаргаж ирүүлсэн байна. Уг материалыг 2010 оны арваннэгдүгээр сарын 24-нд хүлээн авч хянахад дараах нөхцөл байдлууд тогтоогджээ. Дамирангийн Баяраа нь 2010 оны арваннэгдүгээр сарын 1-нд Клиникийн хоёрдугаар эмнэлгийн дотрын тасагт элэгний архаг С вирусын гаралтай үрэвсэл, элэгний хатуурал, архаг дутагдал өвчний оноштойгоор хэвтэж эмчлүүлсэн аж. Өвчтөний түүхийг нээж үзлэг хийхэд баруун бугалга, мөр, ар нурууны хэсгээр гүн хөхрөлттэй, өөр хөхрөлтгүй байсныг эмчлэгч эмч батлан хэлсэн байна. Мөн түүнтэй адил элэгний өвчтэй хүмүүсийн цусны бүлэгнэлт мууддаг. Бусад хүнийг бодвол аливаа хүнсний бүтээгдэхүүнээс амархан хорддог, судасны нэвчимтгий чанар ихэссэн, бүлэгнэлт багатай үед гадны биеттэй шүргэлцэх, унах, биеийн хэсгээс хүчтэй базах, тариа хийх зэрэгт тэр орчмын газарт хөхрөлт үүсдэг онцлогтойг мөн дурьджээ.
Түүнчлэн Д.Баяраа анхны үзлэг эмчилгээ хийлгэж байхдаа эмчдээ “Спрайт” ундаа ууснаас болж хордлоо” гэж хэлсэн байдаг юм байна. Үүний дараа уг асуудлаар тайлбар авахыг хүсэхэд тайлбар өгөхөөс татгалзаж, “Цагдаагийн газраас албан бичиг өгвөл мэдүүлэг өгье” гэжээ. Тиймээс тайлбар авахгүйгээр ярилцахад “2010 оны аравдугаар сарын 25-ны орой хэрэг явдал гарсан. Талийгаач ах Д.Энхбаттай холбоотойгоор хүмүүс надад халдсан. Цаг нь болохоор холбогдох баримтыг гаргаж өгнө. Одоо үзүүлэхгүй” гэсэн байх юм. Харин Д.Баяраагийн амьдардаг байрны харуул, СӨХ-ны захирал нар тийм явдал болоогүйг батлан хэлжээ. Ингээд хохирогч байж болзошгүй Д.Баяраа нь мөрдөн байцаагчид тайлбар өгөхөөс татгалзсан тул шүүх эмнэлэгт үзүүлж, хордсон эсэхийг тогтоох, бусад ажиллагааг гүйцэтгэх боломжгүй болжээ. Улмаар эрүүгийн хэрэг үүсгэх боломжгүй гэж үзээд прокурорын 2010 оны арванхоёрдугаар сарын 7-ны 111 тоот тогтоолоор эрүүгийн хэрэг үүсгэхээс татгалзсан шийдвэр гаргасан байна. Ийм бичиг ч илгээсэн байх юм. Харин эдүгээ “Д.Баяраа Германд Б.Хурцын эсрэг мэдүүлэг өгөхөөр очоод байгаа” гэх мэдээлэл хэвлэлд гарчихаад байна. Цаад утга нь “Ахыг нь үхэлд хүргэсэн гол эзэн нь Б.Хурц” гэж үздэг хэвээрээ бололтой. Хэдийгээр Б.Хурц Д.Энхбат агсныг Монголд авчирсан нь үнэн боловч яах аргагүй хоёр хөл дээрээ зогсдог, эсэн мэнд хүн хүлээлгэн өгсөн байдгийг нотлох баримтууд баталдаг юм. Өнөөдөр Б.Хурцын ч, Д.Энхбатын ч ар гэрийнхэн хүнд байдалд байгаа. Хэн хэн нь “Энэ хэргийн үнэн мөнийг олоосой” гэж, бас битүүхэндээ ямар тавилангаар холбогдсондоо гомдолтой ч явдаг биз ээ.
Дашрамд дурьдахад, Дамирангийн Энхбат гэж хэн бэ гэдгийг урьд нь хэвлэлээр хангалттай мэдээлсэн байдаг. Товчхондоо, 1961 онд Улаанбаатарт төрсөн. Эхнэртэйгээ дунд сургуульд хамт суралцаж байгаад 1987 онд гэр бүл болсон. Тэд хоёр хүүтэй болоод 1993 онд салсан. Эдүгээ эхнэр нь хоёр хүүгийн хамт Берлин хотод амьдардаг. Тэд бүгдээрээ Герман улсын иргэн болжээ.
Д.Энхбат 16 настайгаасаа гэмт хэрэгт холбогдож эхэлсэн бөгөөд 1977-2004 онд нийт 47 жил зургаан сарыг шүүхээс сонссоноос 16 жилийн ялыг биеэр эдэлсэн гэх харамсалтай түүх буй. Түүний үйлдсэн гэмт хэргийн зүйл анги, шүүхээс ногдуулсан шийтгэлийг харж байхад 1977, 1978, 1979 онд “зодож тарчлаасан”, “танхайрсан”, давтан бүлэглэж хулгай хийсэн”, “хорих газраас бүлэглэн оргосон” гэсэн тайлбарууд хөвөрчээ.
Харин 1982 онд “Хутга мэс ашиглан, бусдын биед санаатай гэмтэл давтан учруулсан”, 1992 онд “Улс нийтийн эд хөрөнгийг хулгайлж, ашиглан шамшигдуулсан”, “Хууль бусаар хил зөрчсөн, тэр ч байтугай “Үүргээ гүйцэтгэж явсан засгийн төлөөлөгчийг эсэргүүцсэн”, “Тээврийн хэрэгсэл авч зугтаасан” зэрэг дөрвөн зүйл ангиар 14 жилийн ял шийтгүүлсэн байх юм. Үүнээс дөрвөн жилийн ялыг биеэр эдлээд 1996 онд өвчний учир ялыг хойшлуулах шийдвэрээр суллагдсан байна. Дараа нь 1998 онд “Бусдын эд хөрөнгийг залилан мэхэлж, ашиглан шамшигдуулсан хэргийг давтан үйлдэж , “Хорих ял эдлэхээс зайлсхийх, “Баримт бичиг, тамга тэмдэг, хэвлэмэл маягт хуурамчаар үйлдэх, бэлтгэх, борлуулах, ашиглах” гэмт хэрэг үйлдэн 13 жилийн хорих ялаар шийтгүүлсэн боловч 1998 онд эмнэлгийн магадлагааг хуурамчаар гаргуулж, шоронгоос суллагдсан гэсэн түүх байдаг ажээ. Мөн албан ёсны зарим баримтад “Эрүүл мэндийн шалтгаанаар ял хойшлуулсан” хэмээн бичсэн байх юм. Яг энэ үеэс л талийгаачийн биеийн байдал хүндэрч, хатуу тавилантай өвчнийх нь эхний шинж тэмдгүүд илэрч эхэлсэн байдаг. Тухайлбал, элэг нь хатуурч, устан амьсгал бачууран ярьж чадахгүйд хүрээд байсныг гэрчлэх хүн цөөнгүй байдаг. Тэгэхээр Д.Энхбат агсан Б.Хурцаар хүргүүлж ирээд тамлагдсандаа бус хүнд өвчнөөсөө болж амиа алдсан болов уу. Үүнийг батлах баримт, холбогдох акт ч хангалттай бий. Түүнчлэн тангараг өргөсөн эмч нар өвчтөнийг ялтан уу, хэн бэ гэдгийг ялгалгүйгээр амь насыг нь аврах үүрэгтэй. Энэ үүргийнхээ дагуу ч чадах бүхнээс хийсэн байдаг билээ.
Энэ талаар эрэл хайгуул хийх явцад Хорих ангийн нэгдсэн эмнэлэгт түүнийг эмчилж байсан мэс заслын эмч Т.Даваатай хэдэн хоором ярилцах боломж олдсон юм.
-Та Дамирангийн Энхбат агсныг 2003 оны зургаадугаар сарын эхээр ирэхэд анх үзэж, хүлээж авсан эмч мөн үү. Тэрбээр эмнэлэгт хүргэгдэн ирэхдээ биеийн байдал нь ямар байв. Түүнийг “Эрүүдэн зодож тарчлаасан” гэж ярьдаг. Тэгж үзэхээр хэмжээний ил шарх сорвитой ирсэн эсэхийг батлах цөөн хүний нэг нь та болоод байна л даа?
-Намайг Түдэвийн Даваа гэдэг. Би 2001-2009 онд Хорих ангийн нэгдсэн эмнэлэгт мэс заслын эмчээр ажиллаж байсан. Талийгаач Д.Энхбат манай эмнэлэгт эхлээд ирэхэд анхны үзлэг хийж, хүлээж авсан эмч нь би биш. Тунгалаг гэдэг эмч анх үзлэг хийж хүлээн авсан. Тэрбээр одоо ч Хорих ангийн нэгдсэн эмнэлэгт ажиллаж байгаа. Д.Энхбат манай эмнэлэгт 2003 оны зургаадугаар сарын 3-23-ны өдрүүдэд хэвтэж эмчлүүлсэн. Тэгэхэд би мэс заслын эмчийн хувьд үзлэг, эмчилгээ хийж байсан нь үнэн. Эмчлүүлэхээр ирэх үед гадны нөлөөллөөр үүссэн, задарсан ил гэмтэл, шарх, сорвигүй байсан. Эмнэлэгт хүргэгдэн ирэх болсон шалтгаан нь шулуун гэдэснээс нь цус гараад байсан учраас хэвтэж эмчлүүлэх шаардлагатай болсон юм билээ. Гэхдээ бид хагалгаа хийгээгүй.
-Яагаад хагалгаа хийгээгүй юм бэ?
-Яагаад гэвэл, элэгний хатууралтай байсан. Цус нь бүлэгнээд хэт шингэн байсан учраас мэс заслын дараах шарх нь эдгэхгүй байх. Мөн дахин цус алдаж болзошгүй гэж үзсэн юм.
-Тэгээд хагалгаа хийлгэлгүйгээр эмнэлгээс гарсан гэсэн үг үү?
-Тийм. Эмнэлэгт 14 хоног хэвтэж эмчлүүлээд гарсан. Ингээд нэг жилийн дараа дахин ирж хэвтсэн. Тэр үед бүр муудсан байсан.
-Яагаад улам муудсан юм бол. Яг ямархуу байдалтай байсан бэ?
-Элэгний хатууралтай, арьс нь шарласан, хэвлийн өмнөх ханын судаснууд нь томорсон. Цус алдах нь ч ихэссэн байдалтай байсан. Дахин ирэхдээ дотрын тасагт хэвтэж эмчлүүлсэн. Бараг 40-өөд хоног хэвтсэн байх. Сүүлдээ эмч нарын зөвлөлийн хурлаар оруулж хэлэлцүүлэн “Эрүүл мэндийн хувьд ял эдлэх боломжгүй” гэж үзээд эмнэлгээс гаргасан юм. Эмнэлгээс гэртээ гараад гурав хоноод нас барсан гэдэг. Бид эмнэлгээс гаргасан өвчтөнөө эргэж тойрдог. Тэгээд л нас барсныг нь мэдсэн.
-Таны хэлж буйгаар сүүлд ирэхэд харагдаж байсан тэр шинж чанарууд болон онош нь шууд үхлийн шалтгаан болох магадлалтай юу?
-Үхлийн шалтгаан мөн. Элэг хатуурч, судас томорч, цус алдаад байна гэдэг бол шууд үхэлд хүргэх үндэслэл болно. Гадны нөлөөгүй. Өвчний явц нь хурдан байсан болохоор л амархан хүндэрсэн. Гол онош нь холимог вирусын гаралтай элэгний архаг үрэвсэл. гуурсан хоолойн багтраа, хүндэвтэр хэлбэрийн, байнгын хөдлөлтэй. Ийм оноштойгоор эмчлүүлж байсан.
-Эмнэлгээс гараад дахин ирэх хоорондоо ямар нэг эмчилгээ хийлгэсэн болов уу?
-Хорих ангийн эмнэлэгт эмчлүүлж байгаад ирсэн юм билээ. Гэхдээ байнга эмчлээд байгаагүй байх. Хорих ангийн эмнэлэг 10-20 хоног эмчлээд л гаргадаг юм. Сүүлд ирэхдээ биеийн ерөнхий байдал нэлээд муудсан байсан.
-Тэр хооронд гадны нөлөөллөөс болж бие нь улам муудсан бол дахин ирэхэд мэдэгдэнэ гэж үү?
-Мэдэгдэнэ шүү дээ.
-Та эмчилж байсан эмчийн хувьд түүнтэй ярилцаж байсан уу. Ер нь хувь хүнийхээ хувьд ямархуу санагдсан бэ. Өөрт тохиолдсон зовлон бэрхшээлийн талаар танд ярьж байв уу?
-Ярилгүй яахав. Гэхдээ өвчнийхөө тухай л ярьдаг байсан. Их зөөлөн харилцаатай, энгийн л хүн байсан. “Элэг их өвдөж, зовоож байна” л гэж ярьдаг байлаа. Өвчний шалтгаан нь багадаа шарласан, шарын вирус үлдчихсэнээс болсон гэж ярьж байсан. А, С хоёр вирус хавсарсан учраас өвчин нь их хурдтай газар авч байгааг өөрөө ч мэдэж байсан юм билээ.
-Энэ нь эмч нарын оноштой нийцэж байсан уу?
-Эмч нарын хувьд нэгэнт онош нь батлагдсан, мэс засал хийхэд найдвар муутай учраас амьд мэнд дээрээ гэр орныхонтой нь уулзуулсан нь дээр гэж үзсэн.
-Эмч нарын зөвлөлд хэдэн эмч байдаг юм бэ. Санал нэгтэйгээр ийм шийдвэр гаргасан уу?
-Комисст зургаан эмч байдаг. Бид ярилцаад, дээр нь гаднаас доктор профессор Цэрэндаш багшаа урьж авчраад энэ шийдвэрийг гаргасан.
-Талийгаачийг хэвтэж эмчлүүлж байхад хуулийнхан ирж уулзаж байсан уу?
-Ирж уулзаад л явдаг. Эрүүгийн цагдаагийн газраас болон хорих ангийн төлөөлөл ирж байсан. Дээрх дүгнэлтийг гаргахад ч байлцсан. Талийгаач Хан-Уул дүүргийн шүүхэд харьяалагддаж байсан. Бид шүүгч, өмгөөлөгчийг нь авчирч, өвчтөнийг үзүүлж, биеийн байдал, нөхцөл байдлыг танилцуулна.
-Гэр орноос нь эргэлт хэр ирдэг байв. Тантай уулзаж байв уу?
-Байнга ирнэ. “Ийм болчих гэж” гээд харамсаж, халаглаад, бусад өвчтөний ар гэрийнхний адил хэцүүхэн л байдалтай байсан. Эхнэр, хүүхэд хоёр нь их ирдэг. Бид журмын дагуу боломжийн хэмжээнд нэг их цааргалахгүй уулзуулдаг байсан. Өмгөөлөгч нь ч гэсэн олон ирж уулзсан.
-Уучлаарай. Сүүлийн үед талийгаачийг таньж мэдэх зарим хүн түүнийг “Хоригдож байхдаа зодуулснаас болж их хэмжээгээр шарх сорвитой болсон байсан” гэх яриа үүсгэсэн байдаг. Үүнтэй холбоотойгоор танаас лавласан юм. Та түүнийг зодуурын шарх, сорвигүй ирснийг баттай хэлж байна уу. Яагаад ийм яриа гарах болсон юм бол?
-Ёстой мэдэхгүй юм. Эхлээд эмнэлэгт ирэхдээ өөрөө явдаг байсан. Зөвхөн шулуун гэдэснээс нь цус гардаг, ходоод нь өвддөг болсон тийм л хүн ирсэн. Сүүлд ирэхдээ босч чадахаа больж, тамир тэнхээгүй болсон байсан.
-Ер нь таныг Хорих ангийн нэгдсэн эмнэлэгт ажиллаж байх хугацаанд эрүүл мэндийн шалтгаанаар хэрэг хүлээх чадваргүй гэсэн дүгнэлт бичиж өгөхийг шаардах, дарамтлах явдал гарч байсан уу?
-Үгүй. Бид бие даан дүгнэлт гаргах боломжгүй. Шүүхийн шийдвэр биелүүлэх газрын төлөөлөл, бусад эмнэлгийн эмч нар бас үзнэ. Шинжилгээ хийхэд байлцана. Хуулийн эсрэг дүгнэлт гаргах ямар ч боломж байхгүй.
Тэрбээр ингэж ярилаа. Ямартай ч Д.Энхбат 1996 онд өвчний учир Мааньтын хорихоос суллагдсан. Гэхдээ хуулийнхны хэлдгээр “ял хойшлуулсан”. Өөрөөр хэлбэл, биеийн байдал нь сайжрахаар үргэлжлүүлэн эдлүүлэх ёстой, шүүхийн шийдвэр хүчин төгөлдөр хэвээрээ гэж ойлгох учиртай аж. Гэмт хэрэг нь цагаатгагдсан гэсэн үг биш. Тэр ч байтугай улсын хилээр гарч, гадаадын улс оронд зорчихыг нь хориглосон байсан нь ойлгомжтой. Гэтэл тэрбээр 1998 оны нэгдүгээр сард дахин хэрэгт холбогдоод, тэр жилдээ эмнэлгийн магадлагаа хуурамчаар гаргуулж, мөн л ялыг хойшлуулж байжээ. Тэгээд гадаад руу оргон зайлсан. Интерполоор түүнийг эрэн сурвалжилсан. Ингээд 2003 оны тавдугаар сард Берлин хотноо Монголын хууль, хяналтын байгууллагын ажилтнуудад баривчлагдан ирсэн. Дашрамд сануулахад Интерполоор эрэн сурвалжилж буй хэрэгтнийг тухайн орны цагдаагийн байгууллага баривчлахдаа хэрэгтний байгаа газрыг олж тогтоогоод, зарлуулсан улс оронд нь мэдэгддэг. Өөрөөр хэлбэл, эх орных нь хуулийн байгууллагынхан очиж авдаг журамтай юм байна. Хэрэв тогтоосон хугацаанд очиж аваагүй бол баривчлаад тухайн улсын хуулийн байгууллагынханд хүлээлгэж өгөх тохиолдол ч байдаг гэнэ. Юутай ч Д.Энхбат агсан Монголд ирснээсээ хойш нэг жилийн дараа эмнэлэгт очихдоо биеийн байдал нь хүнд боловч өөрөө явж, ярьж чаддаг байжээ. Яваандаа биеийн байдал нь улам доройтож, амиа алдсан талаар дээрх эмч ярилаа. Тэгэхээр эндээс лав л Б.Хурц Д.Энхбатыг амьд мэнд авчирсан, мөн талийгаач Д.Энхбатзодуулж тамлуулснаас болж амиа алдаагүй юм байна гэсэн хоёр дүгнэлтэд баттай итгэж болох юм биш үү.
"Улс төрийн тойм" сонин