О.Магнай гэж ам л нээвэл “Хувьсгал хийх хэрэгтэй” гэж ярьдаг улаан хувьсгалч нөхөр байна аа. Тэгээд бүр дүрдээ итгэчихсэн өөрийгөө “төрөлхийн хувьсгалч” хэмээн өргөмжилдөг юм билээ. Фэйсбүүкийнхээ танилцуулгад Иргэний хөдөлгөөний удирдагч гэдгээ бахархалтайяа зарласан байгаа юм. Яг л өнөөх “Тунгалаг тамир” роман дээр гардаг хамтралын бухыг мөргөсөн эсэргүү бухыг буудаж алсан улаан хувьсгалч Дорж гэдэг шиг нөхөр юм уу даа. О.Магнай Монголд дахин хувьсгал эхлүүлэх талаар туршлага судлахаар энэ зуунд хувьсгал мандуулсан улсуудад очиж Египетийн хувьсгалыг ихэд таалсан гэдэг. Тэгэхээр удахгүй Монголд Египет маягийн хувьсгалыг тэр эхлүүлж ч мэдэх юм. Уг нь түүнийг “Цэрэгт явж үзээгүй, амьдралын зовлон мэдэхгүй болохоор л хувьсгал гэж цээжээ дэлддэг” хэмээн ярих хүмүүс цөөнгүй байсан. Харин долоодугаар сарын 1-ний хэргээс болж, шоронд суухдаа яажшуухан зовлон үзсэн нь тухайн үеийн “нүүр хувиргалт”-аас тодорхой харагдаж байсан. Тэр үед түүний царайг харсан хүмүүс “Одоо дахиад хувьсгал гэж орилохыг нь харъя” гэж байсан ч О.Магнай улаан хувьсгалч зангаа гээгээгүй байж. Одоо тэрбээр Монголд хувьсгалын тохироо хэзээ бүрдэх вэ гэдгийг судлаад л, тандаад л сууж байгаа. Үүнийгээ ч илэрхийлсэн шүү дээ. Тэрбээр “Монголд хувьсгал хийх хэрэгтэй гэдгийг нийгмийн 75 хувь нь хүлээн зөвшөөрсөн. Хувьсгал хийх цаг хэдийнэ ирсэн” гээд л цээжээ дэлдээд байгаа. Тэгэхээр түүнийг улаан биш час улаан хувьсгалч гэх үү дээ.
Р.Сарангоо
"Улс төрийн тойм" сонин