Дайнд оролцсон ахмад дайчдад орон сууц олгох тухай Монгол Улсын Ерөнхийлөгчийн 2008 оны 170 дугаар зарлигийг Нийгмийн хамгаалал, хөдөлмөрийн яам, Зам тээвэр, барилга, хот байгуулалтын яам, Батлан хамгаалах яам хамтран хэрэгжүүлж байгаа билээ.

Энэ ажлын хүрээнд одоо амьд сэрүүн байгаа 1620 ахмад дайчинд  байр олгож дуусчээ. Ахмад дайчдыг оролцсон дайн байлдааны төрөл, насны эрэмбээр нь жагсааж, эхнээс нь байрны түлхүүр гардуулсаар 90 хүн үлдээд байсан аж. Тэдэнд Монгол Улсын тусгаар тогтнолыг тунхаглан зарласны 87 жилийн ойн өдөр буюу Улс тунхагласны баярын өдөр  орон сууцны түлхүүрийг нь гардуулснаар дайчдад орон сууц олгох ажил дууссан байна.