Монгол орон даяар мал тооллого ид өрнөж байна. Арванхоёрдугаар сарын 9-нөөс эхэлсэн мал тооллого энэ сарын 20 гэхэд дуусах бөгөөд харин дүн нь 25-нд  гарах бололтой. Монгол Улсын хувьд мал тооллогыг жил бүрийн арванхоёрдугаар сарын эхээр, өвлийн идшээ бэлтгэж дууссаны дараагаар зохион байгуулдаг уламжлалтай.  Мал тооллогын ажилд сум, багаас томилогдсон комиссынхон дайчлагдаж буй бөгөөд энэ ажил 10 хоногийн хугацаатай үргэлжлэх юм.  Тооллогод Монгол Улсын нутаг дэвсгэр дээр байгаа таван хошуу малаас гадна өсгөж, үржүүлж байгаа гэрийн тэжээвэр амьтад, гахай, шувуу, зөгий, цаа зэрэг хамрагддаг аж. Манай улсын эдийн засгийн гол салбаруудын нэг мал аж ахуйн салбарт малын тоо толгой өсөлт, бууралт, сүргийн бүтцэд гарсан өөрчлөлт, бүтээгдэхүүний хэмжээг тооцох, МАА-н салбарыг хөгжүүлэх талаар төр засгийн бодлого боловсруулах, хэрэгжилтийг дүгнэхэд шаардагдах мэдээллийг энэхүү тооллогын үр дүнгээс гарган авдаг юм. Хүнс,хөдөө аж ахуй хөнгөн үйлдвэрийн яам болон Үндэсний статистикийн хорооноос энэ ажлыг хариуцан ажиллаж буй.

 Энэ талаар Хүнс, хөдөө аж ахуй, хөнгөн үйлдвэрийн Мал аж ахуйн бодлогын хэрэгжилт, зохицуулалтын газрын дарга Д.Ганхуягаас тодрууллаа.

-Мал тооллого хэзээ дуусах вэ. Энэ ажлын явц ямар байгаа вэ?

-Монгол орон даяар мал тооллого ид өрнөж байна.  Тооллого энэ сарын 9-нөөс эхэлсэн шүү дээ. Баг, сумд явагдаж байгаа мал тооллого  энэ сарын 15 буюу өнөөдрөөс дуусгавар болж байгаа. Аймаг орон нутгууд мал тооллогыноо дүнг нэгтгээд манай яаманд энэ сарын 20-доор ирүүлчих болов уу. 

-Тэгээд мал тооллогын дүн хэзээ гарах бол?

-Мал тооллогын дүн энэ сарын 25 гэхэд гарчихна. Энэ жил Монгол орны ихэнх нутгаар цаг агаар сайхан, зуншлага сайн байсан болохоор малын тоо толгой нэлээд өссөн. Тиймээс энэ тооллогоор өнгөрсөн жилтэй харьцуулахад малын тоо толгой өссөн үзүүлэлт гарах байх гэж бодож байна. Өнгөрсөн жил Монгол Улс нийтдээ 32,7 сая толгой мал тоолуулсан байгаа. Энэ нь өмнөх жилийнхээсээ  буюу 2009 оныхоос 10 гаруй сая толгойгоор буурсан бий.  2009 онд малын тоо 44.0 саяд хүрсэн ч зудын уршгаар 10 сая гаруй  сая мал хорогдсон. Үүнээс бол олон малчин малаа барж, ядуурсан.  Харин энэ жил бидний таамгалаж байгаагаар малын тоо толгой 40 саяд хүрэх болов уу. Гэхдээ малчид маань үүд тайвшрах хэрэггүй. Малчдын  ажлыг шалгадаг цаг нь хараахан болоогүй байна. Ус цаг уурын хүрээлэнгээс гаргасан мэдээгээр энэ өвөл олон жилийн дунджаас илүү цас унаж болзошгүйг сануулж байгаа. Тиймээс малын тоо толгой өсөх нь гэж баярлах эртдэнэ. Хавар гэж малчдын хөдөлмөрийг шалгасан нэг улирал байдаг шүү дээ.