Хувь нийлүүлэгчдийн хурал хойшлогдлоо

Хуучирсан мэдээ: 2011.12.19-нд нийтлэгдсэн

Хувь нийлүүлэгчдийн хурал хойшлогдлоо

“Эрдэнэт” уулын баяжуулах үйлдвэрийн хувь нийлүүлэгчдийн ээлжит хурлыг хоёр тал энэ сард багтаан хийх тухай яригдаж байсан боловч оросуудын хүсэлтээр тодор­хой хугацаагаар хойшлогдсон байна. Харин хоёр улсын хэвлэлүүдээр “Эрдэнэт”  үйлдвэрийн  хувь ний­лүү­лэгчдийн хурлаар юу хэлэлцэх вэ, ямар асуудлыг хөндөх  тухай “бор шувуу” хэдийн нисээд эхэлчихсэн. Хамтарсан зөвлөлийн хурал жилд хоёр удаа болдог бөгөөд өнгөрсөн хавар болсон хурлаар “Эрдэнэт” үйлдвэрийн ерөнхий захирал Ч.Ганзоригийг солих тухай асуудал яригдана гэж байсан боловч хамтарсан зөвлөлийнхөн энэ асуудлын талаар нэг ч өгүүлбэр амнаасаа унагаагүй. Тэгвэл энэ удаад мөн л “Эрдэнэт”-ийн ерөнхий захирлыг солих болно гэсэн шум дэгдээд байна.  Учир нь ирэх 2012 онд Ч.Ганзоригийн “Эрдэнэт” үйлдвэрийн ерөнхий захирлын алба хаших бүрэн эрхийн хугацаа нь дуусгавар болж байгаа юм.  Төрийн өмчийн хорооны Төрийн өмчийн удирдлага, менежментийн хэлтсийн дарга Х.Володягаас  тус үйлдвэрийн хувь нийлүүлэгчдийн хурал хэзээ болох талаар тодруулсан юм. Түүний хэлснээр Эрдэнэт” уулын баяжуулах үйлдвэрийн хувь нийлүүлэгчдийн ээлжит хурал х­э­зээ болох  тов өнөөдөр тодрох юм байна. Хувь нийлүүлэгчид өөр хоорондоо санал солилцсоны эцэст хувь нийлүүлэгчдийн хурал яг хэзээ болох товыг тогтоох аж. Оросуудын тавьсан хүсэлтээр “Эрдэнэт” үйлд­вэ­рийн хувь нийлүүлэгчдийн хурал он гарсны дараа болохоор хойшлогдсон бөгөөд яг хэзээ хийхийг өнөөдөр  хэлэлцэж, эцэслэн шийдвэрлэх гэнэ.

Хувь нийлүүлэгчид “Эрдэнэт” үйлдвэрийн 2011 онд олсон ашиг, төлсөн төлбөр зэрэг санхүүгийн тайланг хэлэлцэхээс гадна тус үйлдвэрт нэвтрүүлэхээр төлөвлөж буй төсөл хөтөлбөрүүдтэй танилцах аж. Хувь нийлүүлэгчдийн хурлын үеэр оросуудаас зэмлэл сонсохгүйн тулд монголчууд нилээд хичээж байгаа бололтой.  Тиймээс тус үйлдвэр дээр  Төрийн өмчийн хорооны Төрийн өмчийн удирдлага, менеж­­ментийн хэлтсийн дарга Х.Володягаар ахлуулсан ажлын хэсгийнхэн  өнгөрсөн амралтын өд­рүүдэд очиж ажилласан байна. Тэд тус үйлдвэрийн удирдлагуудтай уул­заж, үйл ажиллагаатай нь танилцсан гэнэ лээ.

“Эрдэнэт” үйлдвэрийн ерөнхий захирал Ч.Ганзоригийн алба хаших хугацаа ирэх оны дөрөвдүгээр сард дуусгавар болох бөгөөд тэрбээр сонгуульд хүч үзэж магадгүй учраас он гаргаад ерөнхий захирлын суудалд хэнийг томилох вэ гэдэг асуудлыг ярих гэнэ лээ.   Учир нь сонгууль болохоос   зургаан сарын өмнөөс уг албан тушаалтныг аж­лаас нь чөлөөлсөн байх учиртай. Хэрвээ сонгуульд нэр дэвшихгүй гэвэл түүний орыг хэн залгах вэ гэдэг асуудал ирэх дөрөвдүгээр сард шийдэгдэх юм байна.  Гэхдээ Ч.Ганзоригийн зүгээс сонгуульд нэр дэвших бодолтой байгаагаа Төрийн өмчийн хорооныхонд хэл­сэн бололтой. Тиймээс Төрийн өмчийн хороо оросуудад энэ талаар ч уламжилсан аж.  Түүний орыг  зал­га­хаар Монголын хөрөнгийн биржийн гүйцэтгэх захирал Х.Алтайн аав элчин сайд асан Л.Хангай горилж байгаа гэх. Тиймээс тэр Ерөнхий сайд С.Батболдын үүдээр эргэлдэх болсон гэсэн яриа байна.  Тэгвэл 2008 оны сонгуулийг будилантуулсан үймээний эзэн гэгдэх Сонгуулийн ерөнхий хорооны дарга асан Д.Баттулга  ч бас энэ үйлдвэрийн ерөнхий захирлын суу­далд санаархаж байгаа гэнэ лээ.

Хувь нийлүүлэгчдийн хурлаар яригдаж магадгүй гэж монголчуудын айж байгаа нэг асуудал бол УИХ-ын гишүүн Х.Наранхүүгийн АТГ-т шалгуулсан явдал. Түүнийг “Эрдэнэт” үйлдвэрийн  ерөнхий захирлаар ажиллаж байхдаа их хэмжээний хөрөнгө идсэн гэх хэргээр Төрийн өмчийн хорооны дарга Д.Сугартай хамт АТГ шалгаж байсан юм. Хэдийгээр асуудал намжсан ч гэлээ оросууд энэ талаар сөхөж, “Эрдэнэт” үйлдвэрийн ерөн­хий захиралд суух хүнд хатуухан шалгуур тавьж магадгүй гэсэн яриа бас байна.

Ж.Эрхэс

"Ардын эрх" сонин

NewsMN Гар утасны хувилбар Татах
NEWS.mn

Мэдээллийн эх сурвалж